DILI, STLTIMORLESTE.com – Fundasaun Putera Sampoerna husi Jakarta (Indonezia) servisu hamutuk no kolabora ho Fundasaun Dom Bosco Timor Leste no Adidu Edukasaun no Kultura iha Embaixada Republika Indonezia (KBRI) Dili, realiza formasaun Guru Binar ba profesores neebe hanorin iha eskola sira Dom Bosco nian husi eskola primaria to’o ensinu superior.
Formasaun neebe partisipa husi profesores Dom Bosco nain 28 nee, espesialmente loke husi Adidu Edukasaun no Kultura iha KBRI Dili, Prof. Dr. Ikhfan Haris, M. Sc, iha Salaun Instituto Superior Dom Bosco, Komoro, Dili, Tersa (10/12/2024).
Adidu Edukasaun no Kultura, Ikhfan Haris liu husi nia diskursu hatete katak funsaun no knaar neebe nia halao durante nia mandatu iha KBRI Dili mak sai ponte ba Indonezia no Timor Leste iha setor edukasaun nian, kona ba rekursu umanu (profesor sira) no kualidade edukasaun. Tanba nee, formasaun hanesan nee importante tebes ba profesores sira neebe hanorin husi eskola primaria to’o ensinu superior.
“Ohin, hau reprezenta Embaixador Republika Indonezia ba Timor Leste, espesialmente loke formasaun Guru Binar neebe formadu sira mai husi Fundasaun Putera Sampoerna husi Indonezia, tanba sira iha espesialidade kona ba formasaun Guru Binar. Fundasaun Putera Sampoerna nee mos iha universidade,” katak Ikhfan Haris.
Nia dehan, formasaun nee espesial liu kona ba kompetensia profesores sira neebe hanorin iha eskola primaria to’o ensinu superior.
“Bainhira hau to’o iha fatin nee, hau hare buat rua neebe importante tebes iha ita boot sira. Ida mak hau hare imi iha esperansa no ispiritu, signifika katak imi iha esperansa no ispiritu atu hasae kualidade hanorin iha eskola neebe imi hanorin estudante sira. Tanba nee, hau husu ba ita boot sira atu uza oportunidade ida nee ho diak, atu nunee remata husi formasaun, ita boot sira iha esperansa, ispiritu no mudansa iha pratika,” dehan Ikhfan Haris.
Adidu Edukasaun nee mos dehan katak Fundasaun Putera Sampoerna nee fo formasaun ba professor sira iha Provinsi Nusa Tenggara Timur (NTT), Papua no provinsia seluk-seluk iha Indonezia. Formador sira husi Fundasaun Putera Sampoerna iha espesialidade kona formasaun Guru Binar.
Guru Binar hanesan plataforma ida ba dezenvolvimentu kareira profesór nian liuhosi formasaun no dezenvolvimentu profisionál oioin, integradu no sistemátiku, neebé ho objetivu atu hasae asesu ba formasaun profesór liuhosi formasaun neebé estruturadu, bele sukat, tuir nesesidade, neebé permite partisipante sira atu aprende iha tempu neebé deit, iha fatin neebé deit lihosi online (aprendizajen ho ritmu rasik).
Entretantu, Xefe Programa Fundasaun Putera Sampoerna, Juliana hatete katak sira servisu hamutuk no kolabora ho Fundasaun Dom Bosco, neebé durante nee fasilita husi Adidu Edukasaun no Kultura iha KBRI Dili hasae kualidade edukasaun, liu-liu ba profesór sira iha Fundasaun Dom Bosco.
“Ami halao formasaun nee ba loron rua no partisipante profesor sira mai husi eskola primaria to’o universidade iha Fundansaun Dom Bosco. Iha loron rua nia laran nee ami fo formasaun ba profesor sira kona ba estratejia aprendizajen neebe interesante no signifikativu no hein katak bele aplika direitamente iha klase laran hodi lori mudansa ba estudante sira no formasaun nee sei kontinua ho formasaun liuhosi online,” dehan Juliana.
Iha sorin seluk, Xefe Fundasaun Dom Bosco, Pe. Agnelo E. J. Moreira, SDB, dehan katak partisipante iha formasaun nee iha madre no padre sira neebe durante nee hanorin iha eskola sira Fundasaun Dom Bosco nian.
“Tuir lo-loos partisipante sira neebe tuir formasaun nee hamutuk ema nain 30, maibe nain 2 la tuir tanba kestaun balun. Liu husi oportunidade ida nee hau reprezenta Diretor Instituto Dom Bosco hato’o obrigado wain ba formador husi Fundasaun Putera Sampoerna no agradese wain mos ba Adidu Edukasaun no Kultura KBRI Dili neebe espesialmente loke ona formasaun nee,” katak Pe. Agnelo.
(mik)
