BAUKAU, STLTIMORLESTE.com – Kareta multi funsaun neebe destaka iha Sentru Saude Venilale, Munisipiu Baukau paradu, tanba kondisaun aat.
Tuir provas neebe STL rekolha husi fonte importante balun la autoriza publika nia identidade katak, iha loron 14 Maiu 2025, kareta multi funsaun ho sapa matrikula G.06-673 neebe durante apoiu servisu iha Sentru Saude Venilale, antes nee hahu afeta neineik husi roda no kruzeta, maibe la halo manutensaun no reparasaun.
Nunee kareta refere nia kondisaun too iha loron 28 Abril 2025 afeta aumenta tan ba iha parte dadus roda nian hodi too ohin loron la halo operasaun apoiu servisu iha terenu liga asuntu saude nian.
Relasiona ho kondisaun kareta multi funsaun iha Sentru Saude Venilale paradu nee, obrigatoriu komunidade sira neebe kondisaun moras utiliza transporte privadu husi uma ba Sentru Saude Venilale.
Liga asuntu nee, Diretor Servisu Saude Munisipiu Baukau, Cristiano Cipriano Belo rekonhese, kareta multi funsaun iha Sentru Saude Venilale avaria kuaze semana tolu ona, maibe seidauk responde, tanba servisu sentralizadu iha Nasional.
“Kareta Venilale nian nee problema iha roda haat nee laiha kondisaun, informasaun sira nee hau komunika ona nivel Ministeriu Saude, ami hein prosesu husi Ministeriu fo ona mai ami sei responde,” hateten Cristiano ba STL iha Tirilolo Buakau, Kuarta (14/05/2025)
Nia sublina, mezmu kareta multi funsaun iha Sentru Saude Venilale paradu, maibe servisu atendimentu Saude nian hanesan trafere pasiente husi Postu Saude ba Sentru Saude no husi Sentru Saude ba Hospital Rejional Eduardo Ximenes Baukau kontinua lao, tanba apoiu husi kareta multi funsaun neebe destaka iha Sentru Saude seluk iha Munisipiu Baukau.
Nunee servisu atendimentu ba Servisu Kuidadu Saude Primaria implementa liu husi programa Pakote Integradu Saude (PIS), Pesoal Saude sira kontinua implementa iha terenu, tanba iha motorizada hodi apoiu servisu atende komunidade sira iha terenu.
“Pesoal Saude sira nafatin halo atividade, uza motor privadu no motor Governu, dala ruma lao ain deit ba iha komunidade,” Cristiano katak.
Aleinde mos Diretor Servisu Saude Munisipiu Baukau nee informa, kona-ba kombustivel apoiu servisu kareta multi funsaun no ambulansia iha Servisu Saude Baukau stok sufisiente atu apoiu.
(tom)
