DILI, STLTIMORLESTE.com – Kargu xefia foun husi Eskola Baziku Sentral (EBC – sigla português) Manleuana tuir ona formasaun kona-ba implementasaun merenda eskolar no konsesaun eskolar.
Diretor EBC Manleuana, Carlos Correia hatete, hanesan Diretor foun husi eskola ida nee tuir ona formasaun husi ME, laos diretor mesak mak tuir formasaun, maibe adjuntu no Koordenador husi EBF, neebe mak sei partensia husi EBC Manleuana ninia.
“Los duni katak sira husi ME nasional liu husi diresaun asaun sosial eskolar fo ona formasaun mai ami kargu Xefia foun sira, hau rasik, Adjuntu ho ami nian Koordenador filial sira ami tuir ona formasaun iha fulan Agostu liu ba, oinsa mak atu jere osan konsesaun eskolar no implementasaun programa merenda eskolar ninia,” afirma Carlos ba STL iha nia knaar fatin, Segunda nee (16/12/2024).
Nia dehan, formasaun kona-ba konsesaun eskolar nee durante loron tolu, no implementasaun merenda eskolar nee mak loron ida, objetivu husi formasaun nee mak atu halo kontrola ba iha implementasaun programa merenda eskolar iha sira nian eskola EBC Manleuana, oinsa EJP sira ezekuta programa nee ho diak.
(jac)
