DILI, STLTIMORLESTE.com – Tribunal Judisial Primera Instansia Dili liu husi despaisu ikus iha prosesu primeiru interogatoriu, desidi liberdade total ba arguidu nain 6, tanba konsidera detensaun neebe halo ba arguidu sira ilegal.
Ba prosesu ida nee, Ministeriu Publiku promove krime fanu agravadu ba arguidu nain 6 ho inisial, JM, RLCG, JC, C, SPS, DC.
“Despaisu ikus liberdade total hotu, tanba sala iha detensaun. Tuir lei detensaun iha rua, detensaun flagarante delito nomos fora flagarante delito,” dehan Defensor Publiku, Marsal Macarinhas ba jornalista sira iha Tribunal Dili, Tersa (03/12/2024).
Nia hatete, arguidu sira nee Polisia lori mai Tribunal dehan flagarante delito, maibe detensaun sira la flagarante delito, tanba problema akontese tiha madrugada no iha fali oras tuku 10 mak foin ba foti sira iha sira nia uma.
Nia esplika, tuir lei tenke uza mandadu tribunal nian, se la iha mandadu detensaun sira tenke liberdade hotu.
Krime neebe iha investigasaun kontinua lao nafatin ba oin, maibe detensaun neebe iha mak la tuir lei, no liberta sira husi detensaun total. Sasan sira neebe sira foti la tuir lei tanba la iha mandadu husi Tribunal, no konsidera detensaun neebe iha ilegal la tuir lei.
Antes nee iha alegasaun Prokurador husu Tribunal atu aplika Medida Termo Indentidade Rezidensia (TIR) ba arguidu sira.
Prosesu Primeiru Interogatoriu nee prezide husi Juiz Turnu, Zulmira Auxiladora, Ministeriu Publiku reprezenta husi Prokurador Pedro Batispta, arguidu sira hetan asistensia legal husi Defensor Publiku Marsal Mascarinhas.
(ter)
