DILI, STLTIMORLESTE.com — Visi Prezidente Partidu Libertasaun Popular (PLP) ba Asuntu Órgaun Asosiadu no Movimentu Nasional, Amilcar Araujo dos Reis hatoo hanoin katak, lideransa sira tenke mantein integridade no evita abuzu poder hodi labele han ema seluk nian, tanba han ema seluk nian bele lori impaktu aat ba povu nia moris. Alerta nee reflete liafuan prinsípiu husi atual Prezidente PLP, Taur Matan Ruak (TMR).
Haktuir husi TMR nia lia-fuan simples katak “han ita-nia tos labele ba han ema seluk nian”, Amilcar esplika katak mensajen nee lori signifikadu neebe klean tebes atu badinas no moris ho justisa, hodi prevene hahalok lakohi nonook ka uza sasan neebe propriedade ema seluk nian.
Nia sublinha katak se ema ida iha ona toman atu foti ka han ema seluk nian iha moris lor-loron, bainhira ema nee hetan fali konfiansa sai ukun nain, risku boot mak sei foti hotu povu nia sasan, maski nasaun rasik selu tiha ona ho sakrifísiu no raan husi luta naruk nia laran.
“Signifika katak, kuandu toman ona ho kultura sala han ema seluk nian, entaun ikus mai bainhira sai fali ukun, povu nia sasan no nasaun nian mos sei foti hotu, maski nasaun rasik mak selu tiha ona ho sakrifísiu hotu husi ita nia luta,” tenik Amilcar ba STL, Tersa nee (11/08/2026), hodi husu atu hotu-hotu tau matan ba etika no dever nasiona.
Amilcar Reis hatutan tan katak, konsiensia moral no domin ba patria tenke sai hanesan abut prinsipal ba ema hotu neebe kaer responsabilidade iha governasaun, hodi nunee bele garante dezenvolvimentu neebe justu no povu nia bem-estar labele sai sakrifísiu ba interese grupu ka indivíduu nian.
Iha parte ketak Observador Polítiku, Antonio Magno, hateten katak mensajen no reflesaun neebe hatoo husi lideransa PLP nee sai nuudar alerta importante ida ba kontextu polítiku atual, hodi lembra nafatin katak etika no kultura integridade husi moris lor-loron mak sai baze prinsipal hodi determina kualidade lideransa nian bainhira kaer poder iha estadu nia laran.
“Ia hotu presiza haree kle’an katak kualidade estadu ida depende ba oinsa lideransa sira iha konsiensia moral,atu proteje povu nia interese duke interese partikulár.”dehan nia.
Nunee mos Akademista husi Universidade da Paz (UNPAZ), Samuel da Silva, haktuir katak reflesaun nee lori mos mensajen edukativa ba jerasaun foun sira atu tau matan ba valor moris diak nian, hodi nunee labele uza dalan la loloos hodi buka moris ka kaer poder iha futuru.
(car)
