DILI, STLTIMORLESTE.com – Antes nee Primeiru Ministru (PM) Kay Rala Xanana Gusmão hatete, tinan nee tinan implementasaun programa Governu, tanba nee membru Governu presiza servisu ho fuan.
Deputadu Bankada KHUNTO, Antonio Verdial hatete, tinan nee nuudar tinan implementasaun ba programa IX Governu, tanba nee ba kualidade hanesan Deputadu iha konfiansa boot ba Governu neebe lidera husi Primeiru Ministru (PM) Kay Rala Xanana Gusmão.
“Osan 2025 iha ona, tanba nee bainhira governante sira halao servisu labele hamosu arogansia, maibe servisu presiza koordenasaun, integradu, nunee servisu ho fuan hodi implementa osan tuir programa neebe iha, nunee atinji objetivu dezenvolvimentu ba povu no nasaun”, hatete Deputadu Antonio Verdial ba STL, iha PN, Dili, Segunda (20/01/2025).
Iha parte seluk, Visi Ministru Asuntu Parlamentar (VIMAP), Adérito Hugo afirma, loos tinan nee tinan implementasaun ba programa Governu, tanba nee iha isar bandeira ba loron dahuluk iha fulan Janeiru nee, Primeiru Ministru mos husu atu hotu-hotu, instituisaun Governu no funsionariu sira esforsu aan halao servisu.
(gui)