DILI, STLTIMORLESTE.com – Konselhu Imprensa (KI) realiza Forum Editorial dahuluk iha tinan 2025 ho Autoridade Nasional Komunikasaun (ANC) no Servisu Rejistu Verifikasaun Emprezarial, Institutu Publiku (SERVE.IP).
Forum Editorial dahuluk nee, Konselhu Imprensa servisu hamutuk ho ANC no SERVE.IP aproveita oportunidade nee, Konselhu Imprensa, ANC no SERVE.IP bele esplika ba media, xefe redasaun no jornalista sira tuir idak-idak nia knaar no kompetensia tuir lei haruka, hodi nunee bele promove diak liu tan liberdade imprensa no liberdade espresaun iha Timor Leste.
“Ohin ita ho orgaun reguladora rua importante ida iha setor komunikasaun, ida seluk iha setor ekonomiku, buat rua neebe importante hotu atu kontribui ba liberdade imprensa, liberdade espressun no demokrasia ida neebe buras no saudavel iha Timor Leste,” dehan Diretor Ezekutivu Konselhu Imprensa, António Dias ba jornalista sira iha salaun KI, Quintal Boot, Sesta (14/03/2025).
Diretor ezekutivu husu mos atu halo diskusaun nee ho konsultivu para konhese malu diak liu tan.
“Entaun ho ida nee husu ita atu halo diskusaun ida nee ho konsultivu para ita atu konhese malu diak, nunee evita informasaun, mais realidade iha buat ida menus informasaun taun ho intensaun ida nee mak ita konvida ANC ho SERVE.IP mai atu halo diskusaun diak liu tan,” dehan nia.
Iha neeba Konselhu Imprensa aprezenta mos kona-ba lei komunikasaun sosial nian ba xefe redasaun no nain ba media sira.
“Husi biban ida nee ami sei aprezenta impotensia ba prosesu rejistu iha Konselhu Imprensa baze legal ba kriasaun Konselhu Imprensa nian, primeiru mak lei komunikasaun sosial nu. 5/2014 no lei neebe mak kriasaun estatutu konselhu imprensa nian rasik mak dekretu lei nu. 25/2015,” dehan nia.
(EST 4)
