DILI, STLTIMORLESTE.com – Governu liu husi reuniaun Konselhu Ministru ( KM) aprova projetu Dekretu Lei ba alterasaun dahuluk Fundu Espesial ba Dezenvolvimentu.
Primeiru Ministru (PM), Kay Rala Xanana Gusmão aprezenta iha reuniaun Konselhu Ministrus, hodi aprova projetu Dekretu-Lei ba Alterasaun Dahuluk husi Dekretu-Lei nu. 1/2015, loron 14 fulan-Janeiru, kona-ba Fundu Espesiál ba Dezenvolvimentu. Diploma nee aprezenta husi Primeiru Ministru, Kay Rala Xanana Gusmão, Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago de Fátima Lobato, no Koordenadór Komisaun Ezekutiva ba estabelesimentu Zona Dezenvolvimentu Ekonómika Espesiál iha Oekusi Ambeno (ZEEDOA), João Mendes Gonçalves.
Objetivu husi diploma ida nee mak atu adapta Fundu Espesiál Dezenvolvimentu RAEOA nian tuir dispozisaun foun Lei nu. 18/2023, iha loron 30 fulan Novembru, neebé halakon Zona Espesiál Ekonomia Sosiál Merkadu Oekusi Ambeno no Ataúru no prevee kriasaun Zona Ekonómika Espesiál foun ida. Defini fila fali atribuisaun no objetivu sira fundu nian, neebé tutela mós husi Primeiru Ministru.
Diploma nee prevee implementasaun rejime tranzitória ida ba Fundu Espesiál Dezenvolvimentu nian, hodi fornese ba nia instrumentu jestaun no kapasidade operasionál neebé permite hahú projetus prioritáriu ba dezenvolvimentu, prepara estrutura jestaun ida neebé efisiente no finansia projetu estratéjiku tinan barak ho karákter sosiál no ekonómiku. Medida sira nee ho objetivu atu garante resposta ba estratéjia dezenvolvimentu ba Oekusi Ambeno hotu iha tempu médiu no tempu naruk, ho benefísiu reál liu-liu ba populasaun Oekusi no Timor Leste enjerál.
(gui)
