DILI, STLTIMORLESTE.com – IX Governu Konstitusional liu husi Konselhu Ministru (KM) aprova naran eroi nain 3 ba edifísiu foun Radio Televizaun Timor Leste Empreza Publika (RTTL,EP), David Alex Daitula ba Estudiu Multifunsaun, Nino Konis Satana ba Edifísiu foun andar 4, no Francisco Borja ba Auditoriu iha edifisiu foun.
Sekretariu Estadu Komunikasaun Sosial (SEKOMS), Expedito Dias hatete, ohin KM ikus ba tinan 2024, neebe aprova rezolusaun Dekretu Lei no mos deliberasaun ida, neebe hatoo husi Ministru Prezidensia no Konselhu Ministru no mos SEKOMS.
PCM liu husi SEKOMS hatoo proposta atu atribui naran ba edifísiu foun RTTL nian, neebe dia 19 agora sei halao lansamentu primeiru pedra no Estudiu Multifunsaun, neebe uluk halao husi VIII Governu, no kontinua iha IX Governu neebe trabalhadores RTTL utiliza daudaun hodi halao servisu.
Ohin SEKOMS hatoo proposta neebe mai husi Konselhu Administrasaun RTTL nian, nunee ohin mai aprezenta neebe fo naran erói nain 2.
“Naran ba Estudiu Multifunsaun mak Komandante David Alex Daitula, ba Edifísiu foun andar 4, fo naran Nino Konis Satana. Maibe iha diskusaun Primeiru Ministru Kay Rala Xanana Gusmão hatoo fali proposta ida, tanba haree ba relevansia RTTL, koalia kona-ba informasaun, tanba nee PM propoin naran Francisco Borja da Costa. Maibe erói Nino Konis Satana mos KM konkorda atu atribui ba Auditoriu, neebe sei halo iha edifisiu née”, informa SEKOMS, Expedito Dias ba jornalista sira iha Palasiu Governu, Segunda (16/12/2024).
Entretantu tuir projetu neebé aprezenta husi Ministru Prezidénsia Konselhu Ministrus, Agio Pereira no Sekretáriu Estadu Komunikasaun Sosiál, Expedito Dias Ximenes, Konselhu Ministrus delibera hodi fó naran Francisco Borja da Costa ba Edifísiu Sentrál foun RTTL, EP, naran Nino Konis Santana ba Auditóriu RTTL, EP no naran David Alex ‘Daitula’ ba Estúdiu Multifunsoins RTTL, EP nian.
Edifísiu atuál RTTL, EP nian iha tinan sira ikus nee hetan estragus oin-oin, liu-liu kauza husi inundasaun. Tanba nee, presiza konstrusaun ba edifísiu foun ida neebé bele hadia kualidade servisu neebé presta husi empreza públika ida nee ho signifikativu.
Serimónia lansamentu fatuk dahuluk ba edifísiu foun nee marka ba loron 19 Dezembru 2024.
(gui)
