DILI, STLTIMORLESTE.com – IX Governu liu husi reuniaun Konselhu Ministru (KM) nomeia Noémio Falcão ba Prezidente Konselhu Diretivu TATOLI – Ajénsia Notisioza Timor Leste I.P ba mandatu tinan 2025 too 2029.
Sekretariu Estadu Komunikasaun Sosial (SEKOMS), Expedito Dias Ximenes informa, ohin KM mos aprova nomeia Prezidente Konselhu Diretivu ba TATOLI .
“TATOLI tutela iha SEKOMS, tanba nee hau rasik aprezenta Kandidatu Prezidente Konselhu Diretivu ba TATOLI mak Noemio Mateus Falcão, neebe sei sai hanesan Prezidente foun ba TATOLI hodi troka Prezidente Manuel, tanba nee mandatu sei hahu iha dia 1 Janeiru 2025 too 2029”, hateten SEKOMS ba jornalista sira Kuarta nee (11/12/2024), iha Palasiu Governu.
Tuir Membru Governu nee katak, mandatu Prezidente Manuel sei remata iha dia 1 Janeiru 2025, tanba nee nomeia fali Prezidente foun.
SEKOMS agradese ba Manuel Pinto neebe ho kapasidade tomak, matenek neebe iha, maske difikuldade barak enfrenta, maibe konsege lori naran TATOLI mai too ohin loron. Tanba nee IX Governu liu husi SEKOMS agradese ba kontribuisaun hamutuk ho funsionariu sira hotu.
Tuir nia, ba Rádio Televisão Timor Leste, Empreza Publika (RTTL,EP) prosesu avaliasaun lao hela, maibe mandatu ba Prezidente RTTL, EP sei too fulan Maiu 2025.
Tuir apontamentu polítika too fulan Maiu 2025 mak foin remata, maibe durante nee servisu diak, maske dezafiu no obstakulu barak atravesa, maibe presiza hadia instituisaun nee. Dala barak hanoin se mak atu troka se mak atu ba, maibe oinsa hanoin para atu lori instituisaun RTTL, EP ho TATOLI lao ho diak.
Entretantu KM aprova projetu Rezolusaun Governu neebe aprezenta husi Sekretáriu Estadu Komunikasaun Sosiál, Expedito Dias Ximenes, neebé tuir nia pedidu, ezonera Prezidente atuál Konselhu Diretivu TATOLI – Ajénsia Notisioza Timor Leste I.P, no nomeia Noémio Mateus Soares Falcão hanesan Prezidente foun ba Konselhu Diretivu TATOLI – Ajénsia Notisioza Timor Leste I.P, ba períodu tinan 4, hahú husi loron 1 Janeiru 2025.
(gui)
