AMBENO, STLTIMORLESTE.com – Komandante Polisia Nasional Timor Leste (PNTL) Rejional Oecusse Sesante, Superintendente Asistente Polisia, Angelo Quelo espresa ninia sentimentu triste, bainhira entrega hikas ninia servisu ba Komandante PNTL-RAEOA atual, komandante PNTL Rejional Oecusse, Superintendente Xefe Polisia, Nicolao Francelino da Costa neebe atribui liafuan milisia no liafuan mal, bainhira hetan presaun husi Komandante seseante sira iha tinan kotuk, neebe deside komandante atual ba tuir formasaun iha Dili.
Komandante PNTL Sesante, Superintendente Asistente Polisia, Angelo Quelo espresa tentimentu triste nee iha serimonia ofisial entrega hikas servisu neebe nia asume kuaze tinan ida ho balun nuudar Komandante PNTL-RAEOA, iha Kuarte Jeral PNTL Rejional RAEOA, Kinta (23/04/2026).
“Hanesan PNTL kumpri ordem komando, ohin iha serimonia entrega servisu PNTL RAEOA ba Komandante PNTL RAEOA atual, hau koalia sai buat sira nee, tanba hau nia komandante nee ba tuir formasaun iha Dili, ba ho nervozu, la entrega sasan neebe durante nee uza halo servisu iha Oecusse. Tanba nee mak hau ohin dehan katak, tinan kotuk, Komandante ba tuir formasaun iha Dili, la entrega sasan, ikus hau tenke entrega servisu, tanba komandante ba eskola, depois hau iha nee, sai hanesan komandante interinu, jere servisu iha Oecusse lao ho diak too entrega fali serbisu,” konfesa Komandante PNTL sesante RAEOA, Superintendente Asistente Polisia, Angelo Quelo ba STL iha Komandu PNTL Oecusse.
Nia dehan, mosu insatisfasaun bainhira Komandante PNTL atual inbox nia.
“Mosu Insatisfas bainhira Komandante PNTL RAEOA atual inbox Hau, Laos Liu husi media Sosial, dehan iha 1999, hau harii bandeira Merah Putih iha hau nia uma oin no dehan hau milisia, maibe atu dehan hau nia aman naran Hilario Marques nee laos ema Frente klandestina, maibe Frente Armada tanba iha Oecusse iha ema nain rua deit, ida mak Adelino Cau, liafuan nee mak soke hau nia fuan, tanba nee ohin hau husu bá Komandante atu koalia nee sukat liafuan,” Konfesa Komandante PNTL Sesante, Superintendente Asistente Polisia Angelo Quelo.
Nia dehan, liafuan milisia, nuudar Atoni oan la simu. Nuudar Komandante, labele nerbozu ho ordem komando, tenke ezekuta.
Superintende Asistente Polísia, Angelo Quelo afirma, nuudar membru seguransa sei apoia servisu Komando atu garante situasaun hakmatek iha povu nia leet.
“Hau hanesan Atoni oan, saida mak hau halo ona, la barak, oituan maibe halo. Situasaun iha Oecusse tenke kontroladu. Hanesan polísia, 100% hau apoia atu servisu seguransa lao nafatin tanba komunidade sira tenke moris hakmatek,” nia hateten.
Superintende Asistente Polísia, Angelo Quelo lidera komandu PNTL Oecusse kuaze tinan ida, hahu loron 14 Marsu 2025 too 20 Abril 2026.
Iha oportunidade nee, Komandante PNTL RAEOA atual, Nicolao Francelino da Costa rekonhese katak, buat neebe nia halo ba Komandante Sesante nee tanba hetan presaun husi Komandante Sesante sira.
“Ami nain rua la iha problema, maibe tanba deit hetan presaun mak sai nunee, maibe hau rekonhese katak, saida mak Komandante Sesante deskreve nee, la nega, neebe ohin buat neebe iha hau nia laran tenke fakar sai atu nunee labele rai odiu bá malu, nuudar polisia neebe hamahan aan iha komando PNTL, buat neebe liu ona ohin espresa sai atu hateke ba oin servi povu no nasaun TL liu husi instituisaun PNTL,” dehan nia.
Iha biban nee Komandante PNTL-RAEOA, Superintendente Xefe Polísia, Nicolau dehan, daudaun nia mak lidera hikas Komando PNTL Oecusse no tau prioridade ba asuntu 4 no kompremetidu sei akumula entidade hotu.
Nia hateten, durante mandatu atividade prinsipal 4 mak sai prioridade, primeiru reforsa diak liu tan servisu intelejensia polísia, investigasaun kriminal, patrulhamentu polísia no tranzitu seguransa rodoviaria.
“Ida nee mak planu prioridade neebe mak orienta husi Komando Jeral ba iha munisípiu hotu-hotu inklui RAEOA, tanba nee hau nia prezensa iha nee, oinsa atu koopera hamutuk ho entidade hotu, liu-liu Veteranus Autoridade RAEOA, Autoridade Lokal, juventude rezistensia inklui komunidade sira,” dehan Komandante PNTL Oecusse.
Nia akresenta tan katak, prioridade seluk durante lidera PNTL RAEOA sei kumpre deit Komando Jeral PNTL nian, bazeia planu estratejiku, atu kontinua ezekuta tuir orientasaun, liu-liu halo kontaktu permanente nafatin no dialogu permanente ho komunidade sira, halo ligasaun permanente ho veteranu no entidade sira neebe eziste iha Oecusse.
(jos)
