DILI, STLTIMORLESTE.com – Komando FALINTIL – Forsa Defeza Timor Leste (F-FDTL) asina MoU ho Internasional Committee of The Red Cross (ICRC) atu kontinua servisu hamutuk, liu husi formasaun hasae konhesimentu kona-ba Lei Humanitaria Internasional nian ba membru F-FDTL.
Xefe Estadu Maior Jeneral, Domingos Raul “Falur Rate Laek” dehan, ICRC halo kooperasaun ho Komando F-FDTL para formasaun ba membru F-FDTL sira, kona-ba Lei Humanitaria no Direitu Umanus.
“Tanba ita haree militar sira kuandu ba halo asaun ruma nee sempre halo violasaun direitus umanus nee barak,” hatete Xefe Estadu Maior General F-FDTL, Tenente Jeneral Domingos Raul ” Falur Rate Laek” ba jornalista sira iha Kuartel Jeneral F-FDTL Fatuhada, Dili, Kuarta (26/02/2025).
Nia esplika, uluk iha funu nee ba Libertasaun Nasional, tanba arma de kombate ida nee mak direitus umanus.
“Hau koalia ita nia relasaun ho Forsa Defeza, FALINTIL nee ninia relasaun ho Cruz Vermelha Internasional laos foin mak hahu, maibé hahu kedas iha tempu difisil nia laran, sira asumi hanesan pesa importante ida luta ba Libertasaun Nasional, tanba sira fo apoiu humanitariu, fo mós dadaus informasaun sira neebe relasaun violasaun direitus umanus ba mundu tomak, neebe halo sensibilizasaun Publika Internasional depois mai realiza referendum ba ita,” nia esplika.
Iha fatin hanesan, Head of Deputy-Regional Delegation Internasional Committee of The Red Cross (ICRC) Indonesia & Timor Leste, Johan Guillaume esplika, objetivu MoU ida nee atu kontinua ba iha intensaun servisu neebe mak halo ona ho Komando F-FDTL oinsa atu hasae konhesimentu liu husi formasaun sira ba iha membru F-FDTL.
“Ita haree iha tempu dame nia laran nee mos oportunidade ida neebe mak atu bele hasae membru F-FDTL sira nia konhesimentu ba Lei Humanitaria Internasional, wainhira iha tempu konflitu nian laran, entaun ida nee importante tebes ba parte rua nee bele kolaborasaun,” nia deklara.
Nia koalia, Cruz Vermelha Internasional servisu hamutuk ho Komando F-FDTL ba tempu naruk ona oinsa atu hasae konhesimentu, liu-liu husi seminariu Whorshop sira hanesan Lei Humanitaria Internasional.
Nia afirma, Cruz Vermelha Internasional ninia komitmentu atu halo parseiru no servisu hamutuk nafatin ho F-FDTL liu-liu ba area neebe mak hanesan Lei Humanitaria Internasional sira.
(jen)
