DILI, STLTIMORLESTE.com – Komando Polísia Nasional Timor Leste (PNTL) Munisipiu Manatuto kontínua halo Edukasaun Sivika konaba Lei Kodigu Estrada neebe vigora bazeia ba Dekretu-Lei N.° 6/2003 nee importante ba sidadaun hotu-hotu atu kompri wainhira lori Kareta no motor.
“Sim, ita kontinua halo edukasaun sivika, ita halo edukasaun ba ita nia motorista sira oinsa kondus motor karik tenke uza kapaseti, kareta karik ninia apaleru sira tenke kompletu mak foin halai,” hatete Komandante PNTL Munisípiu Manatuto, Superintendente Xefe Polísia Joni Viana das Regras ba STL liu husi telefone iha nia knaar fatin Komando PNTL Munisipiu Manatuto, Tersa (18/08/2026).
Nia tenik, tanba estadu demoktratiku tenke tane aas ukun rasik aan ida nee, atu nunee nasaun sira seluk mos hatene katak Timor Leste mos bele sai ezemplu mos ba mundu seluk.
“Ita nia sosializasaun nee ba estudante nomos ba motorisa sira, oinsa halao viajen tenke haree uluk motor no kareta nia kondisaun, no uza motor karik tenke uza kapaseti, motor ida tenke tula ema nain rua, labele liu ida nee, nomos konaba Lei kodiku estrada,” nia informa.
Antes nee Diretora Nasional DNTT, Maria Antonia Vitor da Costa esplika iha Munisipiu Dili, sira halao ona sensibilizasaun nee atu estudante sira bele iha kuñesementu klean konaba kodigu Estrada nian.
“Ami nia sensibilizasaun nee liga ho oinsa alin estudante sira bele hetan karta kondusaun liu-liu oinsa atu uza estrada ho seguru, tanba iha lei hateten katak atu lori motor tenke tinan 17 no kareta nian tinan 18. Iha mos alinea G hateten tenke iha deklarasaun husi inan aman maibe tuir teste maka bele hetan karta kondusaun. Ida tan mak tenke hatene sinalizasaun tanba inkomprimenta ba regra sei hakanek ema seluk,” nia deklara.
Nia deklara, ho atividade nee bele motiva diak liu estudante sira oinsa mak sai sidadaun diak uza transporte publiku tenki iha karta kondusaun respeita regra sinais tranzitu halo prevensaun ba infrasaun no asidente Trafégu iha estrada publiku.
“Alin sira sinalizasaun iha rua deit maka horizontal no vertikal, neebe hari iha dalan hodi reprezenta maun PNTL sira. Tanba nee wainhira kondus transporte iha estrada públiku tenki respeita regra sinais tranzitu hodi prevene kazu asidente trafégu,” afirma.
(jen)
