DILI, STLTIMORLESTE.com – Komando Polisia Nasional Timor Leste (PNTL) rejistu makaas ba asidente trafiku nee iha mortalidade nain hitu (7).
Komandante PNTL Munisípiu Manatuto, Superintendente Xefe Polísia Joni Viana das Regras hatete, hahu husi fulan Junhu too Julhu tinan 2026 nia laran konaba asidnete kereta ho motor iha nain hitu (7) mak mate fatin, kanek todan no kmaan nee oituan.
“Kazu asidente mortalidade nee, hau hanoin fulan hirak nia laran nee mortalidade makaas, ita bele dehan nain 7 neebe lakon Vida, kanek kmaan nee oituan deit,” hatete Komandante PNTL Munisípiu Manatuto, Superintendente Xefe Polísia, Joni Viana das Regras ba STL liu husi telefone iha knaar fatin Komando PNTL Munisipiu Manatuto Tersa (18/08/2026).
Nia esplika, nain 7 neebe lakon vida nee kauza halai velosidade neebe makaas tanba dukur, lanu no balun lori motor mai koalia telefone.
“Tuir ita nia haree motorista sira barak mak dukur no lanu maibe kontinua lori motor hodi viajen dook, entaun ikus mai halai la kontrola aan depois lakon vida,” nia esplika.
Nia informa, PNTL kontinua fo hanoin konaba kodigu estrada, oinsa hotu-hotu tenke kompri lei kodiku estrada, nunee mos sinais tranjitu neebe monta ona iha dalan publiku sira.
“Ita husu nafatin, karik sira ba fatin sira neebe kruzamentu tenke halai neineik no tenke komprende sinais tranjitu sira neebe koloka ona iha fatin sira nee, ita kuandu respeitu sinais sira nee vida nee seguru, ita la respeitu sinais sira nee vida la seguru,” nia koalia.
(jen)
