DILI, STLTIMORLESTE.com – Embaixada Republika Indonezia ka KBRI Dili realiza festa povu, hodi komemora loron aniversariu Independensia Republika Indonezia ba dala 81 (17 Agostu 1945-17 Agostu 2026) ho atividade oi-oin, hanesan desportu, ezersísiu fuan nian neebé saudavel, dansa linha no sel-seluk tan.
Festa povu neebe nakonu ho entuziasmu no hamutuk envolve komunidade Indonezia iha Timor Leste halao iha Resintu KBRI Dili, Farol, Palapaso, Dili, Sabadu (15/8/2026).
Desde dadeer, Embaixada Indonézia nian iha Dili nakonu ho ema ho antuziazmu partisipa iha atividade oioin neebé prepara tiha ona. Festa Povu nian hatudu atividade oioin, hahú hosi ezersísiu fuan saudavel no dansa liña nian too kompetisaun oioin ba labarik sira, hanesan kompetisaun han krupuk, korrida mármore no sel-seluk.
Eventu nee laós deit fó divertimentu maibé mós sai hanesan forum ida ba ema Indonézia sira hodi halibur malu no hametin lasu iha momentum komemorasaun independénsia nia leet.
Enkarregadu Negósiu Embaixada Indonézia nian iha Dili, Raden Sakunto Paksi, haktuir katak, festa povu nuudar parte importante ida iha série komemorasaun Aniversáriu Independénsia Repúblika Indonézia nian ba dala 81 no sai hanesan momentum ida hodi hametin hamutuk povu Indonézia nian iha Dili.
“Festa povu nee halo parte iha série komemorasaun sira Aniversáriu Independénsia Repúblika Indonézia nian ba dala 81. Atividade nee mós sai hanesan momentum ida hodi hametin hamutuk povu Indonézia nian iha Díli,” dehan Raden Sakunto Paksi.
Tuir nia, selebrasaun independénsia sira nee laós realiza deit liuhusi atividade serimónia, maibé mós liu husi atividade neebé bele envolve diretamente komunidade.
“Atividade nee laós deit hanesan meiu divertimentu ida, maibé sai mós espasu ba komunidade atu halibur malu, halo interasaun, no selebra hamutuk momentum independénsia Indonézia nian,” dehan Raden Paksi.
Nia mos dehan katak komemorasaun ida nee nuudar forma agradesimentu ida hodi hakonu Indonézia nia independénsia iha neebé povu bele divertidu goza kompetisaun sira.
“Ami mós fornese tipu door prize oioin neebe prepara husi empreza estatal hanesan, Telkomcel, Banku Mandiri, Banku Povu Indonesia (BRI), Pegadaian Indonezia no empreza privadu husi Indonezia iha Timor Leste,” nia tenik.
Nia espera festa povu ida nee bele lao ho diak tamba ida nee hanesan tradisaun ida husi povu Indonezia iha rai laran no rai liur, inklui Timor Leste.
Tanba nee, Raden Sakunto Paksi, fo apresiasaun aas liu ba patrosíniu neebé partisipa iha realizasaun festa povu ida nee.
Nia mos hato’o agradese ba Governu Timor Leste no Polisia Nasional Timor Leste (PNTL) neebe fo seguransa masimu ba eventu ida nee.
Xefe Komunidade Flobamora, Maria Karlos ho nia estrutura hanesan, Sherly Lay Rade, Florida Kedo no Ibu Is neebe mos hola parte iha festa povu nee dehan katak sira entuziasmu tebes hodi partisipa iha eventu nee.
Maria Karlos espresa nia entuziasmu hodi partisipa iha serie atividade sira. Nia dehan atmosfera hamutuk neebé kria halo selebrasaun Loron Independénsia Indonezia ba dala 81 iha Embaixada Indonézia iha Dili sai animadu liután.
“Hau entuziazmu tebes hodi partisipa iha eventu nee. Atmosfera animadu no gostu. Saida maka sente liu maka sentidu hamutuk tanba ami bele halibur hamutuk no selebra independénsia hamutuk”, katak Maria Carlos.
Emosaun festa povu nian hatudu entuziazmu aas hosi povu Indonézia iha Dili hodi simu Aniversáriu Independénsia Indonézia ba dala 81. Atividade desportu, kompetisaun, no atividade konjunta oioin halo parte iha esforsu atu kria atmosfera ida neebé moris, manas, no família ba selebrasaun independénsia.
Laós selebrasaun deit, festa povu mós sai nuudar momentum ida hodi hametin sentidu unidade no hamutuk povu Indonézia nian iha Timor-Leste. Espíritu ukun rasik-an nian manifesta laós deit liuhosi serimónia sira, maibé mós liuhosi atividade sira neebé halibur no envolve diretamente komunidade.
Série komemorasaun Aniversáriu Independénsia Indonézia ba dala 81 iha Embaixada Indonézia iha Dili sei kontinua ho serimónia komemorasaun Proklamasaun Independénsia Indonézia ho izar bandeira iha Segunda, 17 Agostu 2026.
Iha sorin seluk, Xefe Komisaun Organizadora ba Komemorasaun Loron Aniversariu Independensia Indonezia ba dala 81 iha KBRI Dili, Eka Putra Musa Mauboy neebe akompanhia husi Vise Xefe Komisaun Organizadora, Koronel (Arm) Hengky Sweeto Parsaoran, nuudar Adidu Defesa iha KBRI Dili no Sekretariadu Segundu/Pensosbud, Ratu Yulya Charani, hateten, Aniversáriu Independénsia Repúblika Indonézia nian ba dala 81 ho tema” Indonézia neebé Soberanu, Justu, no Prosperu”.
Nia dehan, tema ne’e reflete ideál koletivu no espíritu povu Indonézia nian atu kontinua hamutuk, hametin sinerjia, no realiza prosperidade iha diversidade arkipélagu nia leet. Valór sira no Signifikadu husi Tema Soberanu: Hatudu independénsia, forsa, no soberania nasaun nian hodi hasoru dezafiu globál sira. Justu: Afirma kompromisu ba justisa neebé hanesan ba nivel hotu-hotu sosiedade nian lahó exesaun. Prosperu: Sai hanesan objetivu kompartilladu hodi alkansa prosperidade no progresu iha povu Indonézia nia moris.
“Ami halao atividade oioin ba Loron Independénsia Indonézia nian. Ida mak festa povu nian neebé ohin ami halao, meius ida ba silahturami. Iha eventu nee ami envolve labarik sira, tanba labarik mak futuru nasaun nian. Labarik sira partisipa iha kompetisaun oi-oin no sira neebe manan iha kompetisaun nee hetan prémiu husi patrosinadór sira,” hatete Eka.
Tanba nee, nuudar Xefe Komisaun Organizadora, nia hato’o agradese ba patrosinador sira, hanesan, Pertamina Internasional Timor, SA (PITSA), Telkomcel, Banku Mandiri, BRI, Pegadaian, Ba Uma Resto no sira seluk.
“Ita hein katak ho atividade sira hanesan nee, relasaun entre nasaun rua nee bele sai besik liu tan, tanba Indonezia no Timor Leste maun alin ran ida deit neebe haketak husi istoria. Tanba nee, relasaun kooperativa, relasaun sósiu-kultural, relasaun ekonómika, tenke bazeia ba prinsípiu maun-alin,” tenik Eka.
Nia hatutan tan katak, atividade seluk hafoin festa povu nian mak halo peregrinasaun ba Semitériu Herois Seroja iha Dili, iha loron 16 fulan Agostu tinan 2026, no iha loron 17 fulan Agostu 2026, iha atividade isar bandeira iha parte dader no lokraik.
Nia mos dehan, resepsaun diplomátika sei halao iha fulan Outubru ou Novembru. Sei realiza mos eventu Indonesian Day iha Timor Plaza no Feira Edukasaun iha Sentru Kulturál Indonézia.
(mik/jos).
