DILI, STLTIMORLESTE.com – Tribunal Judisial Primeira Instansia Dili (TJPID) halao prosesu primeiru interogatoriu ba arguidu ho inisial LM.
Arguidu lori mai iha Tribunal, no Ministeriu Publiku (MP) promove ho krime Obstrusaun ba Autoridade Publika.
Juiz turnu Ana Paula halo tiha identifikasaun ba arguidu, hodi deside tama ba iha faze alegasaun. Iha alegasaun Prokurador Antonio Tavares husu Tribunal atu aplika Medida Prizaun Preventiva ba arguidu. Husi parte defeza husu atu aplika medida TIR no Aprezentasaun Periodika.
Rona tiha alegasaun, ikus mai Juiz deside aplika medida Prizaun Preventiva ba iha arguidu.
“Iha alegasaun husi defeza husu Tribunal atu aplika medida Termo Indentidade Rezidensia (TIR) neebe antes nee iha ona, akomula ho medida Aprezentsaun Periodika (AP),” dehan Defeza arguidu nian, Anselmo Akara ba jornalista sira iha TJPID, Kinta (16/04/2026).
Nia hatutan, despaisu husi Tribunal afavor ba alegasaun MP nian neebe husu atu aplika medida Prizaun Preventiva, tanba nee defeza la konkorda sei halo rekursu hasoru despaisu Tribunal nian.
Nia sublina, Tribunal aplika medida Prizaun Preventiva, tanba konsidera arguidu nia konduta nee ba iha autoridade publika hasoru investigador Polisia sira. Tanba iha kazu ida mak arguidu ba presta deklarasaun, maibe arguidu pratika tan krime ida nee, maibe husi investigasaun mak foin hatene lo-loos.
Prosesu nee prezide husi Juiz turnu Ana Paula, Ministeriu Publiku (MP) reprezenta husi Prokurador Antonio Tavares, arguidu hetan asistensia legal husi Defensor Publiku Anzelmo Akara.
Tuir kronolojia katak, arguidu deskonfia pratika hela krime ida, tanba nee autoridade seguransa ba foti arguidu, lori ba presta deklarasaun iha investigador PNTL.
Maibe too iha investigador sira nia fatin, arguidu ho emosaun la kontrola aan, hodi kria tan problema iha fatin refere, hasoru investigador sira.
Tanba nee mak autoridade seguransa detein arguidu, hodi submete ba iha Tribunal.
(ter)
