DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial FSC, tanba komete krimi Arma Branka hasoru lezadu ho inisial CMX.
Iha audensia julgamentu laran Juiz prosesu Ana Paula lee sai akuzasaun neebe mai husi Ministeriu Publiku katak, iha loron 05 Dezembru 2021, oras tuku 21:00 OTL, iha Aldeia Gomes Araujo, Lahane Osidental, lezadu ho nia kolega sira hemu hela tua no kanta karoke hela.
Momentu neeba lezadu mak koalia halimar no goza malu ho nia kolega ida naran Oni, hafoin lezadu nia alin naran Angelmos mak sadik malu ho Oni atu sira nain rua tuku malu, maibe la konsege, derrepente arguidu tuku fali lezadu nia alin Angelmos, tanba la simu ho hahalok husi arguidu nian, lezadu mos halo reazen hodi tuku malu ho arguidu.
Bainhira lezadu ho arguidu tuku malu, arguidu halai tama ba iha uma laran foti katana ida hodi duni no atu taa lezadu ho nia alin Angelmos, iha biban nee lezadu nia maun ho naran Januario mak hakalma tiha situasaun no lezadu mos fila fali ba fatin refere.
Bainhira lezadu too iha fatin nee, derrepente arguidu hasai katana ida ho modelu surik, sona kedas ba lezadu nia kabun, maibe lezadu lori nia liman hodi tahan netik rezulta kanek iha lezadu nia liman karuk, katak arguidu kontinua sona tan husi lezadu nia kotuk, maibe lezadu konsege lori liman satan netik no surik nia tutun mak kona fali lezadu nia liman hodi rezulta kanek.
Momentu neeba lezadu nia feton ho naran Afina mak ba sori netik no hadau tiha surik husi arguidu nia liman.
Konsekuensia husi hahalok arguidu nian, rezulta moras ho kanek iha lezadu nia liman karuk ho ulun, lezadu mos ba halo tratamentu iha sentru saude, maibe la-anexa relatoriu mediku iha autus.
Arguidu halo ho forma livre, ho depropozitu pratika krimi agresaun fizika hasoru lezadu, katak lori katana no surik hodi halo agresaun hasoru lezadu konsidera hanesan meiu ida hodi halo moras no kanek ba iha lezadu nia isin, hatene mos katak katana ho surik nia karateristika kroat, wainhira taa no sona kona ema bele rezulta kanek no mate.
Hatene mos katak katana ho surik nia karateristika kroat no meik, wainhira taa no sona kona ema bele rezulta kanek no mate.
Katak, hahalok arguidu nian ho konsiensia rasik no hatene katak hahalok nee lei bandu maibe arguidu halo nafatin, ho hahalok sira nee konsidera arguidu FSC hanesan autor material ho forma konsumadu Pratika krimi arma branka tuir artigu 145 husi Kodigu Penal.
Hatan ba akuzasaun, arguidu konfesa imprasial ba faktus, arguidu halo duni faktus refere.
Arguidu mos esplika ba Tribunal katak, problema nee liu fulan haat sira rezolve familia tuir kultura no gora arguidu ho lezadu diak malu ona.
Rona tiha arguidu Tribunal deside la rona lezadu tanba arguidu konfesa imprasial ba faktus.
Tribunal husu ba Ministeiru Publiku atu tama ba iha alegasaun.
Iha alegasaun Prokurador Pedro Baptista husu ba tribunal atu aplika pena prizasun tinan 3 suspende ba tinan 3.
Enkuantu parte Pesoa idonia Antonio Maia husu ba Tribunal atu fo Justisa neebe mak justu ba arguidu.
Rona tiha parte rua, Trbunal hadia fali ba dia 11/06/2025 tuku 14:00 loraik atu rona desizaun.
Audensia julgamentu nee prezide husi Juiz Koletivu Ana Paula Fonseca, Ercília de Jesus, José Maria de Araújo, Ministeriu Publiku reprezenta husi Prokurador Pedro Baptista, arguidu hetan asistensia legal husi Pesoa idonia Antonio Maia.
(ter)
