Komete Krimi Insendiu, Tribunal Dili Julga MAFCN

Kazu insendiu, Tribunal Julga MAFCN. (Foto: STL/Terezinha De Deus)

DILI, STLTIMORLESTE.com Tribunal Judisial Primeira Instansia Dili halao julgamentu ba arguidu ho inisial MAFCN, tanba komete krimi Insendiu.

Tuir akuzasaun neebe Juiz Prosesu Jose Gonsalves lee sai katak, iha loron 1 fulan Janeiru tinan 2022 iha tuku 8 kalan, lezadu ABM ho nia familia sira han hemu hela iha uma Komoro, Dili.

Momentu neeba arguidu hamutuk ho nia kolega mane ida lori mina gazolina masa ida, diretamente ba iha lezadu nia rezidensia hodi fui mina Gazolina iha lezadu nia uma varanda oin, no arguidu foti eskeru atu sunu, maibe iha sasin ida mak tebe tiha arguidu dala ida, hodi eskeru neebe iha arguidu nia liman monu tiha ba rai.

Arguidu ho intensaun hanoin atu sunu lezadu nia uma, maibe iha sasin neebe mak impede netik, liu husi tebe arguidu hodi ikus mai eskeru monu.

Tanba nee, Ministeriu Publiku akuza arguidu komete krimi insendiu neebe previstu iha artigu 263 husi Kodigu Penal.

Hatan ba akuzasaun neebe iha, arguidu deklara katak, faktus neebe konsta iha akuzasaun loos hotu.

Arguidu deklara, momentu neeba hahu husi loron 30 Dezembru selebra tinan tuan no tinan foun, arguidu hemu tua hamutuk ho familia sira.

Arguidu deklara, kona-ba lori Gazolina ba fakar iha lezadu nia varanda atu sunu lezadu nia uma nee, momentu neeba arguidu lanu makaas la kontrola aan no la hatene tuir. No ikus mai arguidu matan mos mak arguidu foin rekonhese nia hahalok nee la diak.

Arguidu deklara, depois arguidu lori mai iha Tribunal, no fila husi Tribunal arguidu liu kedan ba iha lezadu nia uma hodi husu deskulpa.

Arguidu sente arepende los ho nia hahalok nee, no promete sei la halo tan hahalok nee iha futuru.

Lezadu mos reforsa tan akuzasaun katak, momentu neeba arguidu kondisaun lanu, maibe lezadu perdua ona arguidu, no husu arguidu atu labele halo tan aktu hanesan nee iha futuru.

Rona tiha arguidu no lezadu, Tribunal husu ba iha Ministeriu Publiku atu tama ba iha alegasaun. Iha alegasaun Prokurador Pedro Baptista solisita ba iha Tribunal atu kondena arguidu ho pena minimu atu suspende nia ezekusaun ba tinan hanesan, tanba konsidera arguidu konfesa imparsial ba faktus.

Enkuantu husi Defeza, João de Carvalho husu Tribunal atu aplika pena multa ba arguidu, tanba arguidu koopera ho Tribunal.

Rona tiha alegasaun, Tribunal adia ba loron seluk hodi rona desizaun.

Audensia julgamentu nee prezide husi Juiz Koletivu, Jose Gonsalves, Jumiati Freitas, Jose Quintao, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku Joao de Carvalho.

(ter)

Share it :

Leave a Reply

Your email address will not be published. Required fields are marked *