DILI, STLTIMORLESTE.com – Tribunal Judisial Primeira Instansia Dili liu husi leitura akordaun deside aplika pena suspensaun ba arguidu ho inisial HA, tanba komete krimi hasoru lezada ho inisial SO.
Iha sala julgamentu laran loron Kinta, (06/03/2025) Juiz Prosesu Jose Escurial deklara katak, provadu arguidu komete krimi Koasaun Seksual neebe Ministeriu Publiku akuza ba arguidu.
Tribunal deklara, kona-ba prosesu nee iha julgamentu antes arguidu deklara ho lezada dame malu ona, no liu husi rezolve nee arguidu fo sala ba lezada hanesan tais, belak no fahi.
Tribunal deklara, arguidu konfesa arepende ba nia hahalok, no foin primeira vez mai iha Tribunal, tanba nee Tribunal deside hodi aplika pena pena prizaun tinan 2, suspende tinan 2 ba arguidu.
Juiz prosesu mos esplika ba arguidu katak, pena suspensaun arguidu la tama prizaun arguidu hela deit iha liur, maibe durante periodu suspensaun nia laran arguidu labele halo tan krimi seluk, se halo krimi seluk Tribunal sei revoga fali atu arguidu ba kumpri periodu suspensaun tinan 2 iha Prizaun, hodi hein julgamentu ba prosesu foun neebe halo.
Tribunal mos fo hanoin ba arguidu atu aktu arrependimentu neebe mak promete ona iha Tribunal, tenke tau iha hanoin atu ba iha futuru labele pratika tan aktu refere, tanba lei bandu.
Tribunal mos husu ba iha Prokurador titular ba prosesu, no defeza arguidu nian atu la konkorda ho desizaun Tribunal nian bele hatama rekursu ba iha Tribunal Rekursu hodi hasoru desizaun neebe Tribunal Primeira Instansia foti.
Tuir regra normal neebe iha, prazu atu halo rekursu sura husi simu notifikasaun desizaun husi Tribunal, durante loron 30 nia laran. No durante loron 30 nia laran mak laiha rekursu ruma hasoru desizaun nee, signifika katak desizaun nee tranzitu injulgadu ka validu ona.
Leitura ba desizaun nee lee husi Juiz prosesu Jose Escurial, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku Jose da Silva.
(ter)
