DILI, STLTIMORLESTE.com – Prezidente Komisaun F neebe trata Asuntu Saude Seguransa Sosial no Igualidade Jeneru iha Parlamentu Nasional (PN), Deputada Maria Bareto husu kompanhia sira atu prepara didiak ai-haan neebe sira fornese ba pasiente sira iha Hospital Nasional Guido Valadares, tanba naan balu neebe kompanhia sira tein balu importa husi nasaun seluk.
Deputada Maria hatete, durante nee Komisaun F seidauk halo fiskalizasaun direita ba ai-haan sira neebe kompanhia fornese ba pasiente sira, maibe halo deit kontrola ba ai-haan neebe iha nee bazeia duni ba rekomendasaun husi doutor espesialista ga lae.
Maibe naan importadu neebe kompanhia sira tein hodi fornse ba pasiente sira balu importa husi nasaun seluk, tanba nee nia husu kompanhia sira atu prepara didiak ai-haan sira molok fornese ba pasiente sira iha Hospital Nasional Guido Valadares.
“Ami mos haree ba kondisaun iha dapur nee ijiene ka lae depois ho sira nia preparasaun neebe mak iha, no ami rekomenda mos ba sira se sira uza hahan importadu husi rai liur hanesan ayam poton no seluk tan, ami husu sira labele tein direita deit, maibe presiza eskalda liu tia nunee bele hasai tia ninia formalin neebe mak iha atu labele fo impaktu ba pasiente sira nia saude,” hatete Deputada Maria ba jornalista sira, iha resintu PN, Kuarta (11/12/2024).
Nia hatutan, Timor Leste seidauk iha laboratoriu neebe espesfiku liu atu halo teste ba ai-haan importadu sira, tanba nee ai-haan importadu sira neebe kompanhia sira hola tein hodi fornese ba pasiente sira tein haree didiak.
Maske nunee Prezidente Komisaun F nee mos rekomenda ba governu estabelese laboratoriu ida iha Timor Leste, nunee ba oin bele halo teste ba produtu importadu sira liu-liu naan neebe importadu husi nasaun seluk.
(alb)
