BAUCAU, STLTIMORLESTE.com – Kompanhia Lokal Nautetu Fatima Unipessoal Lda seidauk finaliza projetu reabilitasaun estrada fatin rua hamutuk kilometru (Km) 5 resin iha Munisipiu Baucau seidauk finaliza, deskonfia abandona servisu.
Tuir lista ofisial neebe STL asesu kona-ba projetu reabilitasaun estrada neebe implementa iha tinan 2023, kompanhia refere hetan kontratu husi Ministeriu Obras Publikas ba fatin rua. Mak hanesan projetu reabilitasaun estrada rural iha Suku Saudate, Postu Administrativu Laga, hamutuk Km 3.25 metrus ho valor orsamentu US$ 455.236,93. No fatin daruak reabilitasaun estrada iha area Samaguia, Suku Tequinomata, Postu Laga Km 2.15 meter ho valor orsamentu US$ 436,794.48.
Projetu rua refere reabilitasaun ho tipu cor beton no ateru inklui fui alkatraun been ho durasaun servisu tinan ida, iha neebe tuir kontratu neebe iha finaliza ona, maibe too ohin loron projetu fatin rua refere seidauk finaliza, tanba iha Suku Sagadate progresu fiziku foin atinji 50% resin no Samaguia foin atinji 30% resin, tanba kompanhia abandona servisu iha terrenu.
Xefe Suku Tequinomata Abílio Diamantino Ximenes kestiona servisu kompanhia refere tanba abandona servisu reabilitasaun estrada iha area Samaguia Suku Tequinomata durante nee abandona servisu.
“Kompanhia Nautetu Fatima durante nee hahu husi Dezembru 2025 too mai agora servisu para, sasan sei iha neeba mais ema mak la servisu,” hateten Diamantino ba STL iha Vila Nova Baucau, Kinta (11/06/2026).
Nia katak, progresu servisu husi kompanhia implementador projetu refere iha terrenu lao lentu, tanba nee Autoridade Suku diriji ona karta ba Autoridade Munisipiu Baucau no oriente ona ekipa Ministeriu Obras Publikas ba fatin projetu haree servisu, maibe hela deit mak ekipamentus servisu nian iha armajen.
Autoridade Suku Tequinomata nee husu Ministeriu Obras Publikas atu fo atensaun ba kompanhia refere, tanba laiha responsabilidade ba projetu neebe Governu entrega ba nia.
“Ita ezije para sira tenke kompleta servisu, tanba servisu neebe sira halo seidauk finaliza, husu para servisu ami hakarak lalais,” Abílio ezije.
Hatan ba kestuan nee, Tekniku Destakadu Obras Publikas Baucau, José R. Cabral hateten, relasiona implementasaun projetu reabilitasaun estrada neebe responsabiliza husi kompanhia refere kuaze iha fatin rua, hanesan Sagadate no Samaguia kuaze seidauk finaliza. Tanba nee Ministeiru Obras Publikas fo ona karta Chamada dala tolu ba kompanhia refere, maibe seidauk kontinua servisu iha terrenu.
“Ita fo chamada dala tolu tutuir malu maibe nia dehan hein lai sei kordena ho kompanhia Cico, mais too agora laiha informasaun ruma,” José katak.
Nia dehan, liu husi karta Chamada ba kompanhia refere parte nain ba kompanhia promete atu servisu hamutuk ho kompanhia internasional Cico hodi aselera servisu reabilitasaun estrada Samaguia, maibe too ohin loron seidauk implementa.
“Se nia la servisu ita fo tan chamada, maibe chamada sira nee mos ami diriji hotu ba Nasional, mak nia la kontinua servisu mak ita hein,” José komenta.
Too notisia nee publika, STL seidauk hetan konfirmasaun ho nain ba kompanhia refere, tanba rezidensia iha Dili.
(tom)
