DÍLI, STLTIMORLESTE.com – Inan isin rua sira preokupa ho falta fatin iha Sentru Saúde Comoro, ne’ebé obriga pasiente rua fahe kama ida.
Natalina Pinto, ida husi inan ne’ebé simu atendimentu iha sentru saúde ne’e, hatete katak falta kama obriga pasiente rua atu uza kama ida.
Nia esplika katak, maski sente moras, pasiente sira tenke tahan hela tanba la iha fatin seluk atu deskansa.
“Fatin la sufisiente no klot, maski sente moras, maibé tenke toba de’it tanba kondisaun mak hanesan ne’e,” dehan Natalina ba jornalista iha Sentru Saúde Comoro, Kinta (05/11/2026).
Nia husu Governu atu fó atensaun ba infraestrutura no fasilidade ba inan isin rua, tanba kondisaun ne’e bele hamosu risku ba inan no bebé.
Nia konsidera katak, partus iha risku boot, tanba moris no mate bele akontese, nune’e presiza atensaun no apoiu adekuadu.
Iha parte seluk, Xefe Sentru Saúde Comoro, Emilia Ayati konfirma katak, infraestrutura no espasu iha sentru saúde ne’e seidauk sufisiente atu responde ba nesesidade pasiente sira.
Tuir Emilia, Sentru Saúde Comoro iha pesoál saúde treinadu, maibé limitasaun infraestrutura obriga pasiente balu ne’ebé iha komplikasaun atu refere ba Hospital Nasionál Guido Valadares (HNGV).
Nia hatete katak, administrasaun iha ona planu atu hadi’a infraestrutura, liuliu iha Sentru Saúde Bemon, atu bele aumenta kapasidade atendimentu ba inan isin rua.
“Atu bele atende partus sira ne’ebé iha komplikasaun antes refere ba HNGV, hodi salva inan no bebé,” dehan Emilia.
Nia esplika katak, inan isin rua ne’ebé iha komplikasaun refere ba HNGV tanba Sentru Saúde Comoro seidauk iha ekipamentu médiku sufisiente.
Maski iha médiku no pesoál saúde, limitasaun ekipamentu sai obstákulu ba atendimentu pasiente ho komplikasaun.
Emilia mós fó sai katak, iha loron 1 rejista inan partus na’in tolu, loron 2 na’in rua no loron 3 mós na’in rua, ne’ebé presiza refere ba HNGV tanba komplikasaun.
Dadus pesoál saúde
Tuir dadus ne’ebé Xefe Sentru Saúde Comoro aprezenta, sentru saúde ne’e iha médiku 41, parteira 34, enfermeiru 28 no pesoál dentista 21.
Aleinde ne’e, iha médiku kontratadu na’in 4, enfermeiru kontratadu 18, parteira kontratada 14, farmasista kontratadu 6 no pesoál saúde públika 12.
(dom)
