DILI, STLTIMORLESTE.com – Relasiona ho okupantes hirak neebe mak too agora sei kontinua hela iha areador eskola nian, nee kompetensia Ministeriu Eduksaun (ME) hodi rezolve asuntu refere.
“Difikuldade neebe ami infrenta mak kona-ba nundasaun nee deit, bainhira udan sempre afeita ba ami nian eskola, ida seluk komunidade iha eskola too agora seidauk rezolve, maibe ita hein deit husi Ministeriu Edukasaun, tanba buat hotu ME mak htene no iha kompetensia atu rezolve asuntu ida nee,” dehan Diretor Eskola Sekundáriu Jeral nu. 4 Setembru Balide, Sergio A. da Cruz ba STL iha nia knar fatin Balide, Sesta nee (05/06/2026).
Sergio afirma, daudaun nee xefe família neen mak too agora sei hela iha areador eskola refere, maibe sira nafatin koopera ho parte eskola, komunidade hirak nee hela kleur ona, dala ruma aprendizajen lao hela, sira ho transporte tama sai iha eskola.
Nunee mos Diretor Servisu Edukasaun Munisípiu Dili, Sabino Pereira hatete, eskola 17 nee ida neebe, tanba ladun lembra didiak, tamba eskola 6 mak hasai ona okupantes sira nee lori ba sira nian hela fatin, neen nee mak eskola 10 de Dezembru, Bidau Akadiru-hun, EBC Sergio Viera de Melo, EBC Hera, EBF Bemori, EBC Esperansa da Patria.
“Dadus hahu husi inisiu nee hau sempre koalia, eskola neebe okupantes sira hela nee iha 23, inklui areador SEM Dili hamutuk 24, ita konsege lori ona okupantes sira nee fila ba sira nian hela fatin, eskola 6, sei falta eskola 17 nee ita nafatin halo koordenasaun ho diresaun relevantes sira,” afirma Sabino.
Nia dehan, atu lori okupantes sira nee ba sira nian hela fatin, ho nunee bele fo espasu ba iha areador eskola ninia, hodi Konstrui sala refetoriu, halo dapur ba merenda eskolar no atividades seluk.
Iha fatin seluk, Diretor Nasional Ensinu Sekundariu iha ME, Benjamin Gomes da Cruz Fernandes dehan, relasiona ho okupantes sira neebe mak too agora hela iha areador eskola, husi Diresaun Ensinu Sekundariu iha ME fo kompetensia ba Servisu Edukasaun Munisípiu Dili no SEATOU hodi haree asuntu nee.
“Hau hanoin kona-ba ita nian okupantes sira iha areador eskola nee kompetensia Edukasaun Munisipiu Dili, sira mak iha kompetensia, ami nian lina koordenasaun neebe mak diak ho sira, ami nafatin fo kompetensia sira atu bele haree asuntu ida nee,” dehan nia.
Benjamin akresenta, nee duni kona-ba asuntu ida nee fo kompetensia ba Diretor Servisu Edukasaun Munisípiu Dili nomos parte SEATOU ninia, tanba eskola sekundariu balun iha Dili, komunidade sira sei hela iha areador eskola nian.
“Ita nafatin husu parte neebe ohin mensiona nee, sira mak iha kompetensia hodi haree ba komunidade neebe hela iha areador eskola nian, maibe ita nian eskola balun komunidade hahu hamamuk ona fatin,” dehan nia.
(jac)
