DILI, STLTIMORLESTE.com – Komunidade iha Munisípiu Aileu balun apoia manorin sira ho fó hela-fatin, tanba to’o agora seidauk iha rezidénsia própria ba profesór sira iha área refere.
Diretora Servisu Edukasaun Munisípiu Aileu, Beatriz de Deus, hatete ba STL liuhosi telefone, Kinta (15/10/2026), katak rezidénsia ba professór sira tama ona iha planu, maibé iha tempu ne’e profesór balun sei hela iha uma komunidade nian.
“Rezidénsia ba profesór sira agora dadaun balun lao hela, tanba tau ona iha planu atu iha tinan oin bele hahú. Agora professór sira balun hela iha uma komunidade nian, tanba komunidade fó apoiu no fó uma ba sira atu bele hanorin estudante sira iha eskola,” dehan Beatriz de Deus.
Nia esplika katak, apoiu husi komunidade importante atu ajuda professór sira hetan hela-fatin, hodi bele kontinua hala’o prosesu ensinu-aprendizajen ba estudante sira, maski seidauk iha rezidénsia própria.
Iha parte seluk, Diretór Nasionál Rekursu Umanu iha Ministériu Edukasaun (ME), João Amaral, hatete katak ME iha ona planu atu harii rezidénsia ba professór sira ne’ebé to’o agora aluga uma ka hela iha uma ne’ebé komunidade fó ba sira.
“Rezidénsia ne’e iha planu, no iha fatin balun komesa ona halo konstrusaun. Maibé ida ne’e kordena ho Ministériu Administrasaun Estatál (MAE), tanba autoridade munisipál balun komesa ona konstrui rezidénsia ba professór sira,” dehan João Amaral.
Nia hatutan katak, rezidénsia ba professór sira importante atu fasilita sira-nia hela-fatin, liuliu iha área sira ne’ebé profesór seidauk hetan alojamentu permanente, nune’e balun tenke aluga uma no balun hela iha uma ne’ebé komunidade fó.
Enkuantu ne’e, Diretór Servisu Edukasaun Munisípiu Ainaro, Patrício da Costa Magno, hatete katak iha planu atu harii rezidénsia ba professór sira iha tinan oin, maibé implementasaun projetu sei depende ba disponibilidade orsamentu.
“Ita prepara atu halo rezidénsia ba sira, tanba tinan oin ita atu halo planu atu harii rezidénsia ba ita-nia professór sira. Agora ita hein hela orsamentu. Ita halo tuir etapa, tanba depende ba ita-nia orsamentu,” dehan Patrício da Costa Magno.
Tuir Patrício, to’o agora professór balun seidauk iha rezidénsia própria, nune’e sira tenke aluga uma iha komunidade ka hela iha fatin ne’ebé komunidade disponibiliza. Situasaun ne’e akontese mós ba bolsista kandidatu professór sira ne’ebé Ministériu Edukasaun koloka atu hanorin iha eskola sira.
“Desde Ministériu Edukasaun koloka mai, ita-nia professór sira seidauk iha rezidénsia. Entaun sira aluga de’it uma iha komunidade, hodi bele hala’o sira-nia knaar hanorin estudante sira liuhosi prosesu ensinu-aprendizajen,” nia haktuir.
Patrício hatutan katak, atu hatene númeru loos bolsista kandidatu professór sira ne’ebé hela iha uma alugada ka iha uma ne’ebé komunidade fó ba sira, presiza halo identifikasaun no atualizasaun dadus.
Nia mós afirma katak, profesór sira hala’o knaar hanorin tuir oráriu ne’ebé determina ona, maski balun hela besik eskola no balun seluk hela iha distánsia ne’ebé la dook liu.
“Profesór sira kada loron hala’o knaar ho di’ak, tuir oráriu ne’ebé iha ona no tuir oras hanorin,” nia afirma.
(jac)
