DILI, STLTIMORLESTE.com — Komunidade sira kontinua fó apoiu ba Ministeriu Edukasaun (ME), liuliu hodi tau matan ba eskola sira ne’ebé besik ho sira nia uma, tanba eskola balun seidauk iha guarda eskola.
Diretór Servisu Edukasaun Munisípiu Ainaro, Patricio da Costa Magno, hatete ba STL liuhusi telefone, Kinta (27/08/2026), katak asuntu guarda eskola nian tama ona iha planu no agora daudaun hela iha prosesu diskusaun ho Ministériu Finansas.
“Kona-ba guarda eskola nian, ita tau hela iha planu, agora debate hela iha Ministériu Finansas. Nee duni ita tau ona iha planu, maibé ita hein deit. Ita nia eskola 69 mak too agora seidauk iha guarda eskola. Ita nia eskola hamutuk 93, maibé balun iha ona guarda eskola, falta eskola 69 mak seidauk iha,” nia informa.
Tuir Patricio, maioria eskola iha área remota seidauk iha guarda, inklui eskola ensinu báziku, sekundáriu no tékniku vokasionál.
Nia hatete katak, durante ne’e eskola sira sei kontinua mantein guarda ne’ebé iha ona, enkuantu hein aprovasaun ba planu ne’ebé bele permite halo rekrutamentu guarda foun.
“Distánsia eskola sira nee besik ho komunidade sira nia uma. Tanba nee, ita nia komunidade sira mak tau matan hela ba eskola sira nee. Balun ita nia koordenadór eskola sira mak tau matan hela ba eskola sira,” nia dehan.
Enkuantu, Diretór Servisu Edukasaun Munisípiu Bobonaro, Miguel Freitas, hatete katak Servisu Edukasaun Munisípiu Bobonaro kontinua halo identifikasaun ba eskola sira ne’ebé too agora seidauk iha guarda.
Nia hatete katak kuaze eskola barak iha área remota seidauk iha guarda, tanba nee dadus kona-ba eskola sira ne’ebé laiha guarda sei prepara atu submete ba nivel nasionál.
“Ita nafatin identifika ita nia eskola ne’ebé too agora laiha guarda. Depois mak ita hato’o pedidu ba nasional para bele haree asuntu ida nee, tanba kuaze ita nia eskola barak mak seidauk iha guarda. Balun iha ona no balun seidauk. Nee duni bainhira ita halo identifikasaun hotu, ita sei hato’o ba parte nasional,” dehan Miguel.
Miguel informa, la’ós eskola hotu iha Munisípiu Bobonaro mak laiha guarda, maibé balun deit. Dadus ne’ebé Servisu Edukasaun Munisípiu identifika uluk hamutuk 24 eskola, maibé dadus ikus aumenta ba 27 eskola.
“Dadus nee mak ami identifika. Lo-loos nee 24, maibé dadus ikus nee 27. Husi númeru nee kompostu nivel pré-eskolár, ensinu báziku, sekundáriu no ensinu tékniku vokasionál. Depois mak ami halo pedidu ba ME nasional. Tanba nee, daudaun ami sei prepara hela dadus ida nee, ho nune’e bele submete ba nasional,” nia afirma.
Nune’e mos, Diretór Servisu Edukasaun Munisípiu Likisá, Julio da Silva, hatete katak situasaun guarda eskola iha Munisípiu Likisá mos seidauk kompletu.
Nia hatete katak iha eskola balun iha ona guarda, maibé iha mos eskola balun ne’ebé too agora seidauk iha guarda.
“Hau hanoin loos duni katak ita nia eskola ne’ebé lokaliza iha Munisípiu Likisá nee balun iha guarda eskola no balun too agora seidauk iha guarda. Maibé balun mak iha ona guarda no balun too agora seidauk iha,” dehan nia.
(jac)
