BAUKAU, STLTIMORLESTE.com – Komunidade Suku Bukoli, Postu Administrativu Baukau Vila, Munisipiu Baukau 5% la asesu linha eletrisidade no 15% la asesu bee moos, tanba distansia hela fatin dook husi fasilidade neebe instaladu iha Suku Bukoli.
Xefe Suku Bukoli, Terezinha dos Santos hateten, atu eleva infraestrutura bazika hanesan eletrisidade, bee moos, estrada no seluk tan, komunidade sira iha nivel Suku konbre territoriu nasional kuaze sei presiza, tanba seidauk lao efetivu, maibe atu responde kompetensia hotu iha Governu sentral no lokal, tanba Autoridade Suku nuudar orgaun kiik iha baze atu identifika preokupasaun komunidade hodi relata ba Autoridade kompetente sira iha nivel Munisipiu too Nasional.
“Iha nee eletrisidade kuaze 95% asesu ona, bee moos too 85% barak seidauk asesu, hau nia objetivu nee atu tama uma haree buat sira nee hotu,” hateten Terezinha dos Reis ba jornalista STL iha Bukoli, Kuarta (04/06/2025).
Nia sublina, komunidade hirak neebe seidauk asesu eletrisidade, tanba uma hela fatin dook husi linha eletrisidade neebe estabelese inklui bee moos komunidade hela dook husi fasilidade neebe kanaliza, nunee obrigatoriu komunidade lao dook hafoin asesu bee moos.
Nia fundamenta, la asesu eletrisidade no bee moos difikulta nesesidade komunidade nian no hanesan Autoridade kontinua identifika relata ba parte kompetente atu responde, maibe posibilidade sei responde ho orsamentu husi Programa Nasional Dezenvolvimentu Suku (PNDS) tinan 2025.
“Agora daudaun iha PNDS nia atividade diak duni, tanba nee agora ami sei lao tuir,” Terezinha dos Reis argumenta.
Entretantu Suku Bukoli rejistu populasaun liu rihun 3 husi Xefe familia 500 resin neebe lokaliza iha Aldeia 6.
(tom)
