BAUKAU, STLTIMORLESTE.com – Komunidade hamutuk ho Autoridade Suku entrega rai hektare rua ba Autoridade Postu atu halo konstrusaun merkadu iha Suku Baguia, Postu Administrativu Kelikai, Munisipiu Baukau.
Administrador Postu Administrativu Kelikai, Paulo Jacinto Moreira esplika, planu konstrusaun merkadu foun iha Postu Kelikai inisia kedas iha tinan 2025 no tinan nee ajusta iha planu 2026 neebe ofisialmente Governu liu husi Ministeriu Obras Publikas orienta ona Autoridade Postu koordena ho komunidade no Autoridade Suku Baguia neebe voluntariamente entrega rai ba konstrusaun merkadu foun iha Kelikai.
“Ita simu ona lista husi Obras Publikas atu halo konstrusaun merkadu Kelikai iha tinan ida nee, tanba nee Postu liu husi enkontru extraordinaria konsulta ona komunidade neebe entrega rai,” hateten Administrador Postu Kelikai, Paulo Jacinto Moreira ba jornalista sira iha Vila Nova Baukau, Kuarta (01/04/2026).
Nia sublina, liu husi konsultasaun entre komunidade ho Autoridade Postu ba rai neebe entrega deside, projetu konstrusaun merkadu Kelikai sei implementa iha area aibubur laran Lawaliu ho medida hektare rua.
Nia fundamenta, ba projetu konstrusaun merkadu Kelikai parte Autoridade Postu seidauk hatene loron implementasaun, tanba seidauk iha data tentativa, maibe Autoridade Postu nafatin hein konstrusaun merkadu refere.
“Negosiante sira agora nafatin iha merkadu tuan maibe risku tebes, tanba afeta beibeik iha tempu bazar foin daudauk ita nia inan ida hetan soke iha neeba lori too Dili nia iis kotu,” Paulo akresenta.
Autoridade Postu nee preokupa ho kondisaun merkadu Kelikai atual neebe fo risku ba vendedores no kompradores iha tempu bazar loron Kuarta-feira no Sabado, tanba laiha espasu ba movimentu transporte no ema lao ain.
Nunee Postu Kelikai prezisa iha merkadu foun neebe seguru hodi la prejudika vendedores no kompradores sira iha tempu bazar neebe determinadu.
“Husu ba Governu Sentral aselera lalais iha iha tinan ida nee ita bele halo konstrusaun nunee komunidade bele ba fatin neebe mak seguru halao negosiu,” Paulo rekomenda
Entretantu negosiante ambulante neebe iha tempu bazar Kuarta-feira no Sabado halao negosiu iha merkadu Kelikai atual hamutuk 200 no permanente hamutuk 84 ho tipu negosiu sira mak hanesan obralan, nesesidade bazika, produtu lokal, matadoru no ikan.
(tom)
