DILI, STLTIMORLESTE.com – Tinan barak Ermera oan sira terus no halerik beibeik ba estrada diresaun Gleno-Letefoho too Atsabe, dala barak ona sira ezije ba governu sentral, maibe situasaun mak nunee hela deit. Tanba nee komunidade sira ho inisiativa hadia rasik dalan iha parte Katrai Leten nian iha loron hirak liu ba.
Tuir informasaun neebe diariu nee asesu husi Komunidade Atsabe, Agustinho Gomes neebe viazen mai Dili hatete, daudaun nee dalan husi Diresaun Atsabe mai Letefoho grave tebes. Tanba ho kondisaun udan neebe tun la para halo rai dodok, kois no nakonu ho tahu, no rai monu. Situasaun nee halo ema ho transporte sira bainhira halo viazem, senti fuan tuku-tuku ka la hakmatek tanba laran susar ho dalan nee.
Nia katak, foin lalais iha loron hirak liu ba, la sala iha Sabado (18/04/2026) foin lalais nee, bainhira ho motor liu mai haree komunidade sira iha fatin neeba hadia rasik dalan iha parte Katrai Leten nian. Komunidade sira uza aisuak hodi kee no taka rasik estrada kuak, no sira mos kee dalan hodi asesu bá merkadu nian.
“Rai neebe uza hodi taka bá dalan kuak no tahu dodok, komunidade sira kee fali rai husi foho lolon nian hodi hatun bá dalan sira kuak nee. Iha parte dalan oan neebe atu kotu tanba rai monu nee, maluk sira lori aisuak kee tan foho oan nee hodi haluan tiha dalan nee,” dehan nia bá STL iha Tasi-Tolu, Kinta (23/04/2026).
Nia hatutan, komunidade sira la uza sasan boot ka makina ruma mak hodi hadia, maibe lori deit sasan sira hanesan aisuak, kanuru no besi hodi kee no suru rai taka ba dalan kuak sira.
Iha sorin seluk, rede sosial ho naran Pajina Offisial Ermera hatete, partidu mak lidera Governu, tanba partidu hetan konfiánsa husi povu. Haree ba kondisaun estrada nee povu terus bebeik ona, neebe lalika tan ona fo konfiansa ba partidu politiku sira. Nee mak, dalan los ba Munisípiu Ermera.
Realidade mak povu Ermera hasoru hela terus loron no kalan, laiha deputadu ka ministru neebe husi munisípiu Ermera toka iha publiku mak nee.
Ermera iha deputadu oituan iha Parlamentu jeralmente husi partidu polítiku. Povu Ermera hatene lolos ona, partidu políitiku nee atu serve see nia interese nesesidade povu ka minoria. Dala barak ema polítiku-sira deklara tenki tuir partidu para hadia moris povu nian. Mais buat nee bosok, partidu nee atu serve interese minoria hodi haterus maioria ka povu.
(eme)
