Komunidade Hein Promete Falsu Ba Indemnizasaun

Xefi Suku Akadiru-hun, Juvinal da Conceição. (Foto STL/EST 1)

DILI, STLTIMORLESTE.com – Politika Governu halo eviksaun, komunidade hein hela indemnizasaun ho promete falsu, tanba too agora Governu rasik seidauk halo indemnizasaun imediatu ba komunidade vitima sira.

“Hau sente triste no sempre fo hatene ba Governu, komunidade iha Suku Akadiru-hun, Bidau Santa, nain 197 sai vitima ba politika eviksaun, maibe too agora seidauk halo pagamentu ba sira, situasaun ida nee halo povu terus ba nafatin,” dehan Xefe Suku Akadiru-hun, Juvinal da Conceição ba STL iha nia knaar fatin, sede suku Akadiru-hun Bidau, Dili, Kuarta (15/01/2025).

Nia dehan, komunidade husi Suku Bidau Akadiru-hun, durante nee koopera tebes ho Governu atu halo nia politika ba eviksaun, hodi halo dezenvolvimentu no promete atu halo indemnizasaun, maibe realidade pagamentu ba komunidade laiha.

Tanba nee sempre dehan katak, Governu tenke prosesa nafatin katak, komunidade sira neebe sai vitima, liu-liu komunidade iha Suku Akadiru-hun, Bidau Santana nian, tenke aselera no halo indemnizasaun, nunee sira bele utiliza halo negosiu ka harii uma hodi hela.

Iha parte seluk, Diretor Ezekutivu Luta Hamutuk (LH), José Alves da Costa hatete, politika eviksaun kontinua nafatin, maibe indemnizasaun too agora komunidade balu hein hela, husu atu halo pagamentu hodi sira bele halo negosiu (Bussines) ruma atu sustenta ba nesesidade sira.

Tanba nee Governu labele kria promesa falsu ba komunidade, kontinua harahun komunidade nia uma, maibe la hatene katak husi fatin nee mak hamosu rekursu oin-oin iha sidade no rai laran, nunee tenke halo indemnizasaun atu komunidade neebe sai vitima bele aproveita ida nee hodi sustenta moris.

Aleinde nee komunidade husi Suku Akadiru-hun, Fransisca Ilda da Costa katak, durante Governu mai halo eviksaun ka sobu uma, hanesan komunidade sente triste, tanba laiha karta notifikasaun mai sobu direta, maibe koopera nafatin, tanba promete dehan halo indemnizasaun, maibe too agora hein hela promete falsu.

Tanba nee husu nafatin ba autoridade lokal, liu-liu Xefi Aldeia, Xefi Suku sira, atu aselera prosesu nee nafatin ba Governu, hodi halo indemnizasaun, tanba uma neebe sira sobu laos Governu mak harii, maibe nee uma familia no individu nian, mezmu rai nee estadu nian, maibe uma nee privadu nian, tanba nee hatene sobu, tenke hatene rezolve, liu-liu fo indemnizasaun ka halo pagamentu.

(EST 1)

Share it :

Leave a Reply

Your email address will not be published. Required fields are marked *