AINARO, STLTIMORLESTE.com — Komunidade iha Suku Kasa, Munisípiu Ainaro, hamutuk ho abitante Suku Webaba, Postu Administrativu Zumalai, Munisípiu Covalima, hatoo agradesimentu no sente haksolok ho projetu reabilitasaun estrada neebe liga munisípiu rua nee.
Kondisaun estrada neebe antes nee aat no dodok iha tempu udan fo susar boot ba movimentasaun loron-loron, liu-liu ba agrikultor sira neebe hakarak lori produtu lokal ba merkadu Suai no Ainaro.
Abitante Suku Kasa, Ediziano de Araujo, haktuir katak reabilitasaun nee sai nuudar resposta ba halerik neebe komunidade infrenta ba tinan barak.
“Ami sente haksolok tebes tanba estrada nee diak uituan ona. Antes nee ami susar tebes atu lori produtu agrikola sira ba merkadu, maibe ho reabilitasaun nee fasilita ona transporte no hamenus tempu viajen,” dehan nia ba STL, iha Ainaro, Segunda nee (17/08/2026).
Abitante sira nee hatutan tan katak ho kondisaun estrada neebe diak, estudante sira no moras sira mos la infrenta tan ho difikuldade atu asesu ba eskola no sentru saude, liu-liu iha tempu udan neebe baibain troka transporte ho lao ain distante.
Iha fatin ketak, abitante husi Suku Webaba, Rosalino da Silva, salienta katak infraestrutura estrada neebe diak fo impaktu diretu ba moris loron-loron no ekonomia no sosiál iha area rural.
“Tempu udan ami susar lori produtu lokal ba merkadu tanba bee nalihun no estrada aat. Ho estrada foun nee, ami nia movimentasaun sai livre no seguru liutan,” katak nia.
Nia dehan, projetu reabilitasaun estrada nee fo benefísiu diretu ba abitante rihun ba rihun iha Munisípiu Ainaro no Covalima hodi hametin rede transporte rai-maran no haburas ekonomia iha area rural sira.
Entretantu, iha loron hirak liu ba, Primeiru-Ministru (PM), Kay Rala Xanana Gusmão, halao observasaun ba progresu projetu reabilitasaun estrada husi Suku Kasa, Munisípiu Ainaro, ba Suku Webaba, Postu Administrativu Zumalai, Munisípiu Covalima.
Observasaun nee halao bainhira Xefe Governu halo viajen liu husi estrada nee ba Covalima, hodi hala’o lansamentu fatuk da-huluk ba Projetu Rehabilitasaun Eskema Irrigasaun Maukola-Lomea, iha Zumalai, Sabadu (15/08).
Iha oportunidade nee, PM Xanana observa diretamente kondisaun no progresu servisu rehabilitasaun estrada neebe liga Munisípiu Ainaro ho Munisípiu Covalima, nuudar infraestrutura importante atu fasilita movimentasaun komunidade no transporta sasan entre munisipiu sira.
Projetu reabilitasaun estrada nee espera bele hadia asesu no konektividade entre komunidade sira iha área Kasa no Zumalai, no suporta atividade ekonomia no dezenvolvimentu lokal.
Projetu reabilitasaun estrada Kasa-Ainaro ba Webaba-Zumalai, Covalima konstrui husi Kompanhia AITULA Construction, Lda no Kompanhia COVEC.
(car)
