RAEOA, STLTIMORLESTE.com – Komunidade iha Bairu Bi-Eli, Suku Bene-Ufe, Sub Rejiaun Nitibe, Rejiaun Administrativa Espesial Oekusi-Ambeno (RAEOA), rekomenda ba IX Governu Konstitusional neebe lidera husi Primeiru Ministru (PM), Kay Rala Xanana Gusmão atu loke estrada ba bairu neeba hodi fasilita movimentu.
Komunidade husu nee bainhira Primeiru Ministru (PM), Kay Rala Xanana Gusmão halao observasaun ba projetu emerjénsia reabilitasaun estrada ligasaun husi Suku Taiboko, Sub Rejiaun Pante Makasar, kobre Suku Usitaku, Sub Rejiaun Nitibe, too Suku Lela-Ufe, Sub Rejiaun Nitibe, RAEOA.
Iha oportunidade nee, Primeiru Ministru konsege hakat too iha Aldeia Lamasi, Suku Bene-Ufe no halao mos dialogu ho komunidade neebe marka mos prezensa husi populasaun okupante bairu Bi-Eli.
Komunidade husi bairu Bi-Eli ho naran Lamberto Falo aproveita prezensa Primeiru Ministru iha aldeia nee rekomenda atu Governu tau matan hodi loke estrada bá too Bi-Eli.
“Hau la husu buat seluk, hau husu deit mak loke estrada ba ami nai bairu. Tanba ami komunidade durante ne’e movimentu liu husi dalan korta, liu husi ai-laran tuan,” hatete Lamberto Falo liu husi nota komunikadu neebe STL asesu media Gabinete Primeiru Ministru, Sabadu (22/02/2025).
Populasaun iha bairu nee too agora balebe halo uma mutin, tanba estrada laiha atu tula materiál inklui rai henek.
Rekomenda mos atu loke eskola filiál ruma, postu atendimentu saude no mos postu seguransa, tanba bairu nee besik liu ho fronteira Indonezia neebe dook tebes husi Oekusi Vila.
Primeiru Ministru, Kay Rala Xanana Gusmão kontente ho rekomendasaun nee, tanba nee hanesan asuntu importante tebes laos deit ba bairu Bi-Eli, maibe mos fatin barak tan iha territoriu tomak no sei tau iha planu atu bele hatoo ba Autoridade RAEOA hodi konsidera iha planu dezenvolvimentu futuru.
Bairu Bi-Eli oras nee daudaun iha komunidade uma ka’in 20 resin neebe hela izoladu liu besik area inur fronteira ho parte Amfoang Timur, Kupang, Nusa Tenggara Timur (NTT), Indonézia.
Vizita nee akompanha husi Diretor Ajensia Dezenvolvimentu Nasional (ADN), Rui Lourenço da Costa, Diretór Kompanhia Rynaldós Unip Lda, Rofino da Costa Rao, parte Obras Publika Rejional, Autoridade Protesaun Sivíl Rejional, Komandante PNTL RAEOA no seguransa.
(alb)
