KOVALIMA, STLTIMORLESTE.com – Hahu husi tempu Indonezia too Timor Leste (TL) ukun aan, Komunidade Suku Ouges, Postu Administrativu Maukatar, Munisipiu Kovalima, kontinua konsumu bee mota hodi uza ba nesesidade loron-loron.
“Ami susar ba bee moos nee kleur ona, no ami konsumu bee mota mos kleur ona, maibe bee mota nee mos dala ruma fulan tolu haat lá sai, nee halo ami triste tebes, tanba atu uza ba han no hemu nee susar,” hatete Estudante Ernestina Andrea Carmo Fátima ba jornalista sira iha Suku Ouges, Kovalima, Segunda (09/12/2024).
Nia dehan, komunidade sira hela iha Suku Ouges mai kuru bee mota lao ho distansia neebe dook tebes, maibe sira esforsu mai kuru bee hodi atende ba nesisidade loron-loron.
“Ami eskola fila mai tenke kuru bee, sente kolen tanba distansia dook tebes, tanba nee husu ba ita nia governu tau matan ba ami nia preokupasaun bee moos,” nia esplika.
Iha fatin hanesan, Xefe Suku Ouges, Postu Administrativu Maukatar, Munisipiu Kovalima, Febriano Pereira informa, komunidade Suku Ouges too agora seidauk asesu ba bee moos, no sira asesu hela bee mota.
“Daudaun nee ita haree komunidade sira asesu hela bee mota,” nia deklara.
Nuudar Xefe Suku triste, nia triste tanba tinan barak komunidade sira iha Suku Ouges asesu mak bee mota. Wainhira bee mota maran sira labele konsumu ona bee.
(jen)
