DILI, STLTIMORLESTE.com – Maske durante nee komunidade Zulo Knua, Suku Zulo, Postu Administrativu Zumalai, Munisipiu Kovalima, hadau malu bee, maibe daudaun nee sira asesu ona bee posu neebe iha.
Lia hirak nee hatoo husi komunidade Tereziano Braganca ba STL liu husi telefone, Domingu nee.(15/12/2024).
“Agora udan been posu nakonu, ami la susar ona bee moos, maibe iha fulan hirak liu ba nee ami hadau malu bee iha tempu kalan, tanba bee posu maran, agora tempu udan bee posu tolu nee nakonu, bee torneira nee ami la asesu tinan ida resin ona, neebe tinan ida resin nee ami uza deit bee posu,” nia afirma.
Nia hatutan, bee posu tolu nee balun sira uza ba haris, tein, fase ropa, maibe bee posu rua seluk nee tenke sae rai lolon, no ida seluk besik hela sira nian uma, ropa nee tenke lori ba iha bee posu mak fase no bele uza ba haris.
Nunee mos Marito Barros nuudar lia nain iha Suku Zulo hatete, bainhira udan sira la susar ba bee moos, maibe bailoron nee sira tenke hadau malu bee iha kalan, tanba bee maran no bee posu tolu neebe iha sira tenke hadau malu deit, maibe too tempu udan nee bee nakonu no sira la hadau malu ona.
“Bainhira udan ami la susar ba bee moos, maibe bailoron nee ami tenke hadau malu bee iha kalan, tanba bee maran no bee posu tolu neebe iha ami tenke hadau malu, maibe too tempu udan nee bee nakonu no ami la hadau malu ona bee,” dehan nia.
(jac)
