BAUCAU, STLTIMORLESTE.com – Partidu Demokratiku (PD) halao konferensia Postu Administrativu ba dala IV iha Postu Administrativu Vemasse, Munisipiu Baucau, iha neebe Koordenador PD Vemasse kritika no alerta ba estrutura Nasional katak, estrutura Postu Vemasse lakohi ona sai deit ponte ba PD.
Sekretariu Jeral Interinu Partidu Demokratiku Francisco Borolaku aprezenta, konferensia nivel Postu Administrativu mak atividade importante ida husi Partidu Demokratiku nian preparasaun ba konferensia Munisipal no ba kongresu Nasional.
“Konferensia ida nee nia esensial mak atu halibur fali delegadu sira hotu husi Aldeia, Suku, Postu atu haree fali sira nia programa tinan hirak liu ba no defini fali politika foun no eleze sira nia koordenador ho vise tama ba servisu durante tinan lima,” hateten Borolaku ba jornalista sira, hafoin remata serimonia konferensia neebe realiza iha Vemasse Tasi, Sabadu (15/08/2026).
Nia komenta, husi konferensia refere estrutura PD iha Postu Vemasse bele konsolida liu tan forsa prepara eleisaun Parlamentar tinan 2028 hodi fo mudansas ba numeru vontante PD nian iha Vemasse.
Tanba iha eleisaun sira liu ba, PD hetan numeru votus kiik iha Vemasse, maibe ho konferensia refere neebe partisipasaun, kompostu estrutura Postu too Suku liu nain 100, bele ganha ona konfiansa eleitores sira nian ba PD atu manan iha Vemasse.
“Fiar katak ba oin sei iha mudansa boot, uluk liu sira iha deit votantes 500 hanesan nee, maibe ba oin diak liu tan PD nia ezistensia iha Vemasse,” Borolaku katak.
Sekretariu Jeral Partidu Demokratiku nee kompromete, bainhira estrutura PD iha Postu Vemasse servisu diak lori PD sai partidu mais votadu iha Vemasse, PD prontu realiza nia komprimisiu sira hanesan, sei hadia diak liu tan setor agrikultura iha Vemasse, industria peskas nian inklui hadia diak liu tan konektividade estrada entre Suku no Suku inklui Suku ba Postu hodi fasilita liu tan komunidade lokal nia rendimentu.
Borolaku husu estrutura PD iha Postu Administrativu Vemasse atu servisu makaas liu tan kobre too nivel Aldeia divulga visaun no misaun partidu nian ba eleitores sira, maibe husu labele hamosu problema ho partidu seluk iha baze, tanba unidade no solido mak dalan lori Timor Leste sai nasaun neebe dezenvolvidu.
Iha fatin hanesan, koordenador eleitu Partidu Demokratiku iha Postu Vemasse, Benjamin Domingos Lemos Freitas hateten, knaar foun neebe simu husi Partidu Demokratiku laos oportunidade, maibe nuudar responsabilidade neebe sein vesementu, tanba nee prontu simu knaar refere kompromete sei haburas no haboot PD iha Vemasse.
Maibe prezisa servisu hamutuk liu husi koordenasaun no kooperasaun entre estrutura Suku, Postu, Munisipiu too Nasional, tanba atu lori PD ba vitoria koordenasaun no kooperasaun mak importante.
“Ami hakarak hateten buat ida, ami Vemasse urutang ketiga iha Baucau, maibe ami lakohi deit sai ponte husi rezultadu neebe ami fo, ami hakarak liu husi ponte neebe mak ami harii, tanba durante ami akompanha ami nuunka hetan rekomendasaun husi Postu, Suku ga Aldeia, nuunka hetan fatin ruma, husi ohin ba oin ami nia rezultadu tenke valoriza, labele hatama malu husi kotuk deit, aat liu tan ses husi estrutura neebe mak iha,” Benjamin ejize.
Koordenador Postu ejize nee, tanba durante PD hamutuk ho partidu CNRT ukun, estrutura PD iha Postu Vemasse la hetan rekomendasaun ba servisu iha instituisaun Governu nian, tanba nee nia husu estrutura Munisipiu no Nasional atu hadia politika refere hodi fo vantajen ba estrutura PD nian hotu iha nivel Suku no Postu.
Nia rekomenda ba estrutura Munisipal no Nasional atu valoriza estrutura PD iha Postu Vemasse mak, estrutura PD iha Vemasse sei halao servisu ho vontade hodi atinji metas PD nian iha Postu Administrativu Vemasse.
“Ami rekomenda mos ba estrutura PD neebe agora asume Sekretariu Estadu, Ministru no Asesor balu, ami ba karik loke odamatan ba ami, labele taka odamatan ba ami, tanba akontese ona hau ba la fo dalan ba hau atu tama, se akontese tan hanesan nee ami sei foti asaun ruma,” nia ejize atu hadia atendimentu ba PD nia ema sira.
Enkuantu Vise Sekretariu Jeral Partidu Demokratiku Munisipiu Baucau, Francisco Xavier da Silva Guterres enkoraja estrutura Partidu Demokratiku iha Postu Vemasse atu kalma hein prosesu sira, hanesan kuda nuu hun ida iha esperansa sei kuu iha tinan lima tuir mai.
“Imi kuda esperansa iha imi nia fuan luta la saugate, esperansa katak tinan lima mai la hetan servisu imi nia oan sei hetan servisu, imi nia oan la hetan servisu imi nia beoan sei hetan servisu, tanba nee hau dehan kuda rasik imi mak sei kuu rasik,” Francisco komenta.
Sekretariu PD Munisipiu Baucau nee mos husu estrutura PD Postu Vemasse atu servisu ba PD ho funa no laran, tanba rezultadu hatudu iha eleisaun sira liu ba, mezmu Suku sira iha Postu Vemasse kuaze instala hotu estrutura no fiskais akompanha eleisaun, maibe iha kabina de votus PD la hetan votus nein ida.
Tuir Francisco, buat sira nee hanesan konta deit ona, maibe husu atu servisu makaas hodi aumenta numeru votante iha Munisipiu Baucau, kada Suku hetan deit votante 100 responde ba Suku 62 iha Baucau, PD hetan tiha ona votante 6.200.
“Nee hanesan T.P.C ida hau foo Suku ida 100 deit bele hakat liu ona saida mak tinan 10 resin neebe ami halo. Ikus liu hau fo parabens ba sira atu servisu ho ekipa unidade, problema uma laran tur hamutuk dada lia hanesan manu fatin neebe ke determina,” nia hakotu.
(tom)
