DILI, STLTIMORLESTE.com – Konkorente hamutuk nain 66 konkore ba iha konkursu neebe agora lao hela, ba iha Supremu Tribunal Justisa (STJ) no Tribunal Rekursu (TR).
Komisaria ba Komisaun Rekrutamentu Juiz Supremu Tribunal Justisa (STJ), Carmelita Caetano Moniz hatete, total kokorente vaga ba Juiz Supremu Tribunal Justisa no Juiz ba Tribunal Rekursu hamutuk ema nain 66.
“Numeru nee aplikante neebe aplika ba vaga ba Juiz Supremu Tribunal Justisa ema nain 38 kompostu husi Juiz 28, Prokurador Republika nain 4, jurista nain 4. No ba kokorente sira neebe konkore ba iha vaga Juiz neebe atu tuur iha Tribunal Rekursu hamutuk nain 28,” dehan Carmelita Moniz ba jornalista sira liu husi konferensia imprensa iha Supremu Tribunal Justisa Kolmera, Sesta (07/08/2026).
Nia dehan, vaga Supremu Tribunal Justisa nee nia kriteriu kokorente tenke iha esperiensia Juize tinan 10, nunee mos kokorente ba vaga ba Juiz ba Tribunal Rekursu tenke mos priense tinan 10.
Esplika tan, ba kandidatu sira neebe mak selesiona iha prosesu selesaun dokumentu sei halo teste iha 18 Setembru 2026. No juri sira sei mai husi Portugal too iha Timor Leste iha dia 15 Setembru no fatin ba iha teste nee iha edifisiu Supremu Tribunal Justisa nian.
Nia akresenta, ba kandidatu sira neebe mak liu iha prosesu selesaun dokumentu, komisaun sei dilibera hodi notifika sira hahu iha loron 1 Agostu 2026, no sira nia naran sei publika iha Sentru Formasaun Juridiku Judisiariu.
Nia hatutan, ba kandidatu sira neebe la liu iha prosesu entrevista, juri sei fo tempu hodi halo reklamasaun durante prazu loron 15. Juri iha tempu loron 10 para fo resposta ba iha kandidatu sira nia reklamasaun.
Iha fatin hanesan, Komisariu Komisaun Rekrutamentu ba Juiz Supremu Tribunal Justisa, Avelino Coelho dehan, agradese ba kandidatu sira neebe ho vontade tomak kokore ona vaga nee, espera boa sorte. Ho kokorente sira nee, tinan nee Timor Leste bele estabelese Supremu Tribunal Justisa.
“Ami agradese tanba sira iha vontade no korajen duni atu aplika vaga Supremu Tribunal Justisa, hamuttuk ema nain 60 resin, nee pozitivu duni tuir espetasaun ami komisaun nian,” dehan nia.
(ter)
