DILI, STLTIMORLESTE.com – Durante nee kada profesores ida-idak halo kontrolu estudantes liu husi lista prezensa neebe mak prepara ona.
“Ita nian profesores ida-idak halo kontrolu ba ita nian estudantes sira liu husi lista prezensa neebe mak iha ona, tanba nee estudantes nee mak la mai, nee ita nian profesores sira hatene hela, tanba sira bazeia ba lista prezensa neebe mak ita nian profesores sira prepara ona, nee duni ita bele hatene ona estudantes neebe mak ativu no neebe mak la ativu iha aula loro-loron,” dehan Diretor ESJ 10 de Dezembro Comoro, Manuel Verdial ba jornalista STL iha nia knaar fatin Comoro, Kuarta nee (15/07/2026).
Nia dehan, prezensa estudantes sira nian durante nee ativu iha aula, maske balun mai eskola maibe la tama iha sala, maibe maioria estudantes sira durante nee ativu iha prosesu ensinu aprendizajen, tanba manorin sira kada loron nafatin halo kontrolu ba estudantes sira liu husi lista prezensa, tanba nee kada profesores prepara lista prezensa, bainhira atu sai eskola tenke bolu estudantes ida por ida, ho nunee profesores sira bele identifika estudantes neebe ativu no la ativu iha aula.
“Ita nian profesores sira hanorin ho pasiensia mak barak, tanba estudantes neebe mak mai iha eskola nee ho karakter neebe diferente, oinsa atu muda mentalidade ida nee mak manorin sira mak tenke pasiensia, hamriik iha oin oinsa halo esplikasaun ba estudantes sira, dala ruma balun hakarak rona, ida nee manorin sira mak presiza pasiensia deit ona.
Tuir Manuel, kada loron sira halo planu de aula molok sira atu halao aprendizajen ba estudantes sira, nee duni antes hanorin estudantes iha sala, kada profesores sira halo planu de aula nee importante tebes.
“Nuudar Diretor Eskola husu ita nian profesores sira, oinsa atu prepara ita nian estudantes sira, husu atu ita nian estudantes sira mai eskola presiza tuir aula husi ita nian profesores sira, se estudantes mak la ativu nee atu aprende saida,” nia afirma.
Iha parte ketak, Superintendente Edukasaun Munisípiu Dili, Cesarina C.Guterres hatete, liu husi monitoring neebe inspetor sira halao iha eskola sira, nee estudantes husi eskola ida-idak tuir aula ho diak, nunee mos profesores sira halao aprendizajen iha eskola lao ho diak, nee duni prosesu aprendizajen iha eskola lao diak hanesan baibain.
(jac)
