DILI, STLTIMORLESTE.com – Korupsaun nuudar inimigu ba Estadu, tanba nee ajente Estadu hanesan Komisaun Anti Korupsaun (KAK) tenke kombate no presiza kontrolu iha ministeriu hotu.
Kestaun nee hatoo husi Diretor AJAR, Jose Luis de Oliveira ba jornalista sira iha nia knaar fatin Farol, Kuarta (26/02/2025).
Nia hatete, korupsaun nuudar inimigu ba nasaun tanba halo kiak nasaun, tanba nee KAK bainhira identifika ona tenke halo investigasaun.
Diretor nee dehan, korupsaun iha rai ida nee akontese barak, tanba nee KAK deskonfia iha korupsaun ruma tenke kombate.
“Bainhira iha atendimentu ruma neebe ita deskonfia iha subornu, iha familiarizmu, buat sira nee hotu tenke kombate, labele haree kazu balu deit balu lae, tenke investiga iha ministeriu hotu laos ida por ida maibe hotu, tanba krimi nee tuir prinsipiu artigu 16 konstituisaun ema hotu iha lei nia oin trata hanesan, se mak komete krimi tenke prosesu, labele haree fali ida nee kor partidu karik, ida nee keta hau nia familia karik, tenke investiga hotu, tanba korupsaun no naok povu nia osan halo kiak nasaun,” Katak Diretor.
Nia mos husu KAK kontinua halo investigasaun ba ministeriu neebe deskonfia iha korupsaun, no presiza mos investiga sira neebe uluk ministru komete korupsaun tribunal notifika tiha ona maibe too agora lalao.
“Tribunal mos hau la hatene, serake nia fraku ka nia mos haree ema ka oinsa, tanba iha semana kotuk hau nia kolega ida nia nuudar sasin deit nia la marka prezensa iha prosesu audensia iha Tribunal polisia ba kaptura ba detein iha sela, maibe enkuantu koruptor balu neebe tribunal notifika ona nee too agora tribunal la ba kaptura, ida nee ita haree hanesan diskriminasaun ida, nee duni koruptor nuudar inimigu estadu ita tenke kombate,” katak nia.
Nunee mos Diretor HAK, Feliciano da Costa Aroujo hatutan, KAK presiza halo investigasaun ba iha area DNTT nomos ministeriu hotu-hotu, labele iha fatin ida deit.
“fo osan nee korupsaun, katak fo ba broker sira mak urus nee korupsaun, broker sira la servisu iha Ministeriu relevante tanba saida mak sira mak tenke servisu, be o ida fulan fulan selu o nee oinsa, ita tenke hanoin buat ida nee, osan neebe mak Estadu fo ba o servisu nuudar profisionais ou funsionariu profisionais o tenke didika o nia aan maske o simu salariu kiik oan labele hanoin mak han bosu no buka ita nia toman aat hanesan nee labele,” katak nia.
Nia dehan, presiza mos investiga balu neebe level kiik maibe uma andar kareta luxu no motor ida nee presiza investiga didiak.
“Labele cek deit serve presiza mos cek DNTT tanba sira mak urus sim buat sira nee hotu dala ruma selu dala ruma ema balu mak urus no Ministeriu seluk tan,” katak nia.
(eme)
