DILI, STLTIMORLESTE.com – Tersa nee (11/05/2026) ekipa husi Diresaun Nasional Terras Prioridade (DNTP) hetan apoiu husi Munísipiu Dili, nomos parte seguransa PNTL no F-FDTL hodi ezekuta desizaun tribunal hasai obrigatoriu familia uma kain 25 iha Aldeia Postu Penal Aimutin, Suku Komoro.
Tuir informasaun neebe STL rekolha iha terenu Tersa nee katak, antes nee tribunal notifika ona iha tinan 2025 liu bá, maibe tanba komunidade sira neebe okupa rai nee la kolabora no kumpri ho estadu, tanba nee ohin DNTP hamutuk ho parte seguransa PNTL, F-FDTL nomos Munísipiu Dili halo ezekusaun obrigatoriu bá komunidade sira nee too remata.
Tuir fontes konfirmadu husi DNTP nian katak, tuir lista neebe iha DNTP uma kain hamutuk 25, maibe too iha terenu realidade oin seluk fali, uma aumenta tanba balun halo ilegal no halo fali kos iha fatin nee.
Fontes lakohi temi naran nee hatete, notifikasaun husi tribunal nian liu prazu ona, tanba nee ohin ekipa husi terras prioridade apoiu husi MAE, PNTL no F-FDTL hodi muda sira sai agora.
Nia katak, iha dader nee mosu tiha desentendimentu entre sira ho komunidade sira, maibe nee lalais deit tanba hakarak ka lakohi komunidade sira nee tenke husik mamuk fatin nee, ordem estadu laiha ema ida atu kontra.
(dom)
