DILI, STLTIMORLESTE.com – Eviksaun neebe Sekretariu Estadu Toponimia no Organizasaun Urbana (SEATOU) halao nee orientasaun husi Primeiru Ministru (PM), Kay Rala Xanana Gusmão, tanba nee labele fo sala ba SEATOU, Germano Santa Brites Dias.
“Ita haree hirarkia boot husi Ministeriu sira no Sekretariu Estadu sira mak Primeiru Ministru, entaun politika neebe SEATOU halo eviksaun nee orientasaun husi Primeiru Ministru, tanba ita haree katak meiu sira nia mak autoriza,” dehan Diretor Ezekutivu Luta Hamutuk (LH), José Alves da Costa ba STL iha nia knaar fatin Farol, Dili, Tersa (15/01/2025).
Maibe nia dehan, prosesu dezenvolvimentu neebe mak Governu halo presiza haree husi aspetu povu hot hotu nian, lao uza asaun brutal hodi hasoru nia ema rasik, realidade akontese SEATOU mai sobu komunidade nia uma, tuir lo-loos hanesan lider masimu ida, husu atu klarifika katak, hasai povu no komunidade husi nia rezidensia, maibe kondisaun permite ona ka lae, maibe meiu hirak nee la akontese.
Tanba politika ida bainhira akontese, hanesan SEATOU halo evikasaun, orientasaun nee mai husi PM, katak nia mak autoriza hodi SEATOU organiza ka sobu uma komunidade sira nian.
Nunee komunidade labele fo sala ba SEATOU deit, tanba desizaun nee laos mai husi sekretariadu refere, maibe orientasaun ba eviksaun nee PM nia orientasaun, tanba desizaun neebe nia halo atu organiza sidade Dili sai verde, maibe realidade laiha kondisaun neebe dignu ba komunidade vitima sira.
Iha parte seluk, akademiku husi Universidade Nasional Timor Lorosa’e (UNTL), Adelio Andrade Lopes afirma, orgaun soberanu hanesan PM ho onra boot no respeita tebes, maibe la respeita total ba politika neebe daudaun nee akontese iha sosiedade.
Komunidade husu laos atu Governu fo indemnizasaun, mesmu hasai ona sira husi nia rezidensia, maibe aspirasaun komunidade atu kria kondisaun neebe dignu, antes hasai komunidade, maibe realidade laiha kondisaun too agora la hatene paradeiru lo-loos komunidade nian iha munisipiu ka sei iha sidade.
(EST 1)