DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial GA, tanba komete krimi hasoru lezada ho inisial RFS.
Tuir akuzasaun husi Minsiteriu Publiku (MP) katak, iha loron 29 fulan Outubru tinan 2023, maizumenus iha tuku 7:00 kalan, arguidu GA hakilar nia oan, no ofendida RFS rona no hakalma sira, maibe arguidu hakilar ofendida neebe nakonu ho liafuan insulta iha Hera.
Arguidu koalia liafuan insulta nee, hodi halo lezada senti tauk no trauma.
Tuir mai, arguidu kaer ai ida baku lezada, no arguidu tuku dala 1 iha lezada nia ulun, hodi rezulta kanek no raan sai barak.
Ho hahalok arguidu nian hanesan bubu husi parte neebe arguidu halo agresaun, halo lezada sente sofre no moras, bubu no kanek raan sai iha ulun no suku pontu 4, nunee lezada sente trauma kedan.
Arguidu halo ho livre ho objetivu espesifiku atu tuku lezada nia ulun, ho ai pedasuk ida hodi hamosu kanek no raan sai iha ulun. Arguidu mos hatene katak, ninia hahalok nee lei bandu no bele hetan kastigu kriminal.
Nunee, arguidu nuudar autor material ba krimi Ofensa Integridade Fizika Simples, previstu no punidu husi artigu 145 iha Kodigu Penal.
Hatan ba akuzasaun nee, arguidu kofirma faktus sira, los duni iha momentu neeba arguidu baku duni lezada, tanba arguidu hemu lanu.
Enkuantu Lezada mos haforsa tan akuzasaun neebe iha, hodi deklara arguidu halo duni agresaun ba lezada.
Hafoin rona tiha parte rua nia deklarasaun, Tribunal deside ba kedan alegasaun. Iha alegasaun Ministeriu Publiku husu Tribunal atu kodena arguidu pena prizaun tinan 3 suspensaun tinan 1, no selu indemnizasaun ho osan valor UA$ 150.00 ba kanek nebee iha.
Maibe parte defeza husu Tribunal atu fo pena neebe kmaan ba arguidu, tanba arguidu hemu tua lanu mak baku nia feen, nomos arguidu arepende ona ba nia hahalok.
Hafoin rona tiha alegasaun, Juiz prosesu deside adia ba iha loron 13 fulan Fevereiru iha oras 9:00 hodi rona desizaun final.
Audensia julgamentu nee prezide husi Juiz Singular, Fransisca Cabral, MP reprezenta husi Prokurador Napoliao da Silva, arguidu hetan asistensia legal husi Defensora Publika, Agustinha de Olivera.
(ter)