DILI, STLTIMORLESTE.com – Peskizadora Lao Hamutuk husu Prezidente Republika (PR) Jose Ramos Horta atu koalia ho Governu hodi hadia meius transparansia akuntabilidade ba ezekusaun, no Orsamentu Jeral Estadu 2027 tau prioridade ba setor agrikultura.
Lia hirak nee hatoo husi Koordenadora no Peskizadora Lao Hamutuk, Marta da Silva ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Sesta (07/08/2026).
Peskizador hatete, mai halo enkontru ho Prezidente Republika hodi husu Prezidente koalia ho Nonu Governu konstitusional hodi hadia meius transparansia akuntablidade ba ezekusaun, no husu iha orsamentu Jeral Estadu ba tinan 2027 tau prioridade ba setor agrikultura, nunee bele redus importasaun aihan husi rai liur mai Timor Leste.
“Ami mos husu ba Nain Prezidente bele koalia ho Governu atu hadia mos meius transparansia akuntablidade ba ezekusaun inklui mos oinsa iha prosesu elaborasaun orsamentu tinan oin nia nee foti atividade prioridade liu liu setor agrikultura, maske ami haree katak programa barak ba diversifikasaun ekonomia, ami hakarak diversifikasaun ekonomia ida neebe ba liu setor agrikultura. Peskas pekuaria, turizmu sustentavel ida nee bele ajuda liu ita nia ekonomia rai laran,” dehan Marta.
Peskizadora dehan, durante nee defende makaas liu ba fundu Petrolifeiru no kampu balun la funsiona tanba nee bele diversifika fali setor ekonomia bele sustentavel liu dukue kontinua bebeik ho fundu estrativas sira industria estrativas, maske nia bele fo osan barak iha tempu badak maibe nia lasustentavel.
“Entaun osan neebe agora ita sei iha husi fundu petrolifeiru nafatin kontinua uza hanesan makina aranka ida para ita dezenvolve ita nia setor sira seluk, ami mos sempre rekomenda fo prioridade mos ba kapital humanu liu liu husi edukasaun, saude, tanba ida nee pertinente tebes bele ajuda ema nia moris inklui bele liu husi kapital umanu ita bele muda buat balun inklui agora ita tama ona adezaun ASEAN, WTO, ida nee presiza mos ema nia abilidade atu kompete iha merkadu asean no rejional,” katak Peskizadora.
Iha biban nee Prezidente Republika Jose Ramos Horta hatete, nia kontente simu opinaun husi NGO Lao Hamutuk, no assuntu neebe Lao Hamutuk levanta nia sei hatoo ba Governu, bainhira halo enkontru semanal ho Primeiru Ministru Kay Rala Xanana Gusmao iha palasiu Prezidensial.
Liga ho assuntu mekanismo ba agrikultura nia, no prosesu oinsa irigasaun no Barajen ba bee, Prezidente Republika hatete ida nee pertinente tebes tanba bee nee laos deit seguransa ba agrikultura maibe seguransa ba pais estadu ida numeru um iha mundu.
Prezidente Republika hatete atu muda mekanismo liu liu ba diversifika ekonomia aihan nee laos foku deit ba etu ka foos, maibe tenke diversifika ba aihan sira seluk hanesan fehuk, talas aihan neebe nutritivu liu kompara ho fos.
Prezidente kontente no apresia ba opinaun hotu, no husu sosiedade sivil kontinua papel para atu halo kontrola sosial no ajuda politiko nain sira atu nunee iha desizaun ruma ho politika neebe diak liu sustentavel inklusivu, justu ba povu.
(eme)
