DILI, STLTIMORLESTE.com — Eis Deputadu husi Bankada Partidu Sosial Demokrata (PSD) no eis Koordenador CNRT tempu Konsulta Popular 1999, Leandro Isaac, hatoo saudades no relembra fali memoria konaba tempu Unidade Nasional, neebe nakonu ho espiritu amizade no relasaun metin “Ikan ho Wé” iha luta ba libertasaun patria.
Leandro Isaac hatoo kestaun nee hodi hanoin hias fali momentu historiku kriasaun Frente Politika Interna (FPI) husi CNRT-R hamutuk ho FALINTIL, neebe hatudu relasaun metin entre gerilheiru sira ho povu ho filozofia konhesidu “Ikan ho We no We ho Ikan.”
Reflesaun históloriku nee marka memoria iha Waimori, iha loron 17 de Setembru 1998, neebe hatudu katak Unidade Nasional neebe metin no nakloke sai fatuk mamuk, no forsa boot ba povu Timor-Leste hodi hasoru dezafiu iha tempu susar nia laran.
“Iha momentu nee, Unidade Nasional hatudu katak ita hotu nia lian no hakat lao hamutuk iha espiritu amizade hodi hamriik firme, nunee ita bele kontinua haburas relasaun metin ‘Ikan ho Wé’ hodi hametin korajen hasoru dezafiu no susar ruma,” Isaac hatete ba STL liu husi telefone, Kinta nee (20/08/2026).
Nia haktuir katak, espiritu Unidade Nasional neebe harii ho amizade hatudu metin duni relasaun entre estrutura politika, forsa armada FALINTIL, no sosiedade tomak hodi hamriik firme ba prozesu autodeterminasaun.
Unidade neebe haburas iha tempu nee sai nuudar pilar fondamental neebe haforsa kbiit povu nian hodi hakat ba Konsulta Popular 1999, no ikus mai lori duni Timor-Leste ba hetan independensia total.
Iha fatin ketak, Observador Polítika, Antonio Magno haree reflesaun nee nuudar lisaun boot ba jerasaun foun hodi manten estabilidade no hatoo katak valor Unidade Nasional neebe kria iha tempu luta tenke sai nafatin mata-dalan ba konstrusaun estadu ho dezenvolvimentu nasionál iha tempu ukun aan.
“Hau haree katak reflesaun historiku nee sai lisaun boot ba jerasaun foun sira atu kontinua manten estabilidade no haburas espiritu Unidade Nasionál iha tempu ukun an,” Magno sublina.
Nia hatutan, jerasaun foun iha dever boot atu foti filozofia ‘Ikan ho Wé’ atu sai matadalan iha prosesu hakat ba oin iha dezenvolvimentu nasional.
Entretantu, Akademista Universidade Paz (UNPAZ), Mariano de Sousa, hatoo katak papel jerasaun foun laos deit ba memora historia, maibe tenke hatudu liuhusi aksaun real atu haforsa unidade no kontribui ba progresu rai-laran.
(car)
