MATEBIAN, STLTIMORLESTE.com – Tenente Jeneral Reformado, Lere Anan Timur hatete, presiza prezerva prinsipiu valores FALINTIL ho unidade nasional.
Tenente Jeneral Reformado Lere Anan Timur hatoo kestaun nee ba jornalista sira, bainhira remata partisipa selebrasaun 20 Agostu hodi selebra ezistensia FALINTIL ba dala 51 iha Foho Matebian, Munisipiu Baucau Kinta (20/08/2026).
Nia hatete, presiza prezerva prinsipiu no valores FALINTIL ho unidade nasional.
“Ita tenke prezerva prinsipiu no valores FALINTIL nia, prinsipiu ida ita nia unidade nasional, prinsipiu ida ke ita tenke foti aas liu intrese estadu no intrese nasaun liu liu halakon intrese ema idak idak no halakon korupsaun halakon familiarizmu, halakon injustisa, ida nee mak prinsipiu no valores neebe FALINTIL husik ba jerasaun foinsae liu-liu ba matenek intelektual,” Lere hatete.
Eis Komandante F-FDTL hatete, jerasaun foun sira tenke toma konsiensia katak ukun ida nee folin karun tebes, no Matebian nee fatin istoriku tanba ema rihun ba rihun mate iha Matebian rate laiha, balun neebe hakoi moris iha fatuk koak too ohin loron nia ruin no isin sei iha deit koak laran, tanba nee joven foinsae sira tenke toma konsiensia.
Jeneral Reforma Lere dehan, ohin loron lider rezistensia sira katuas hotu ona, tanba nee joven sira presiza hakbesik aan ba sira nunee konta hela istoria neebe los ba foinsae, se povo no foinsae laiha istoria hanesan mos isin laiha klamar.
Nunee mos Prezidente Republika, Jose Ramos Horta husi nia diskursu hatete, bainhira selebra legadu FALINTIL nian, tenke haree ba Forsa Defeza sira nia prezente no futuru.
Rezistensia nia vitoria boot liu maka transforma forsa libertasaun nasional ida ba instituisaun republikana, subordinada ba Konstituisaun, Estadu Direitu no valor demokratiku sira. Sira neebe luta ba independensia horisehik sai instituisaun ida neebe servisu ba sidadaun hotu-hotu no ba defeza Republika.
“F-FDTL sira reprezenta FALINTIL nia kontinuidade istorika, maibe sira ezerse misaun neebe diferente. FALINTIL moris iha kontestu okupasaun no luta ba sobrevivensia nasional,” dehan PR Horta.
F-FDTL eziste iha Estadu independente, soberanu no demokratiku, ho responsabilidade atu prezerva pas neebe alkansa ona, defende integridade territorial no garante seguransa nasional. Konstituisaun RDTL define momoos misaun ida nee atu defende independensia nasional, soberania no integridade territorial, hodi kontribui mos ba estabilidade, pas no seguransa rejional no internasional.
(eme)
