DILI, STLTIMORLESTE.com – Ministeriu Eduksaun (ME) kestiona se deit mak atu loke eskola foun tenke kumpri regras no hetan lisensiamentu.
“Kona-ba eskola internasional hau koalia fila-fila ona, ema hotu-hotu hakarak atu loke eskola, nee ema nian direitu, maibe ME nian kompetensia tomak atu jere eskola hotu-hotu iha Timor laran, liu-liu iha area edukasaun pre eskolar, ensinu baziku, sekundariu, signifika saida, se deit mak atu loke eskola foun ida iha Timor, mezmu eskola públika rasik tenke hetan lisensiamentu husi ME, pelumenus prienxe padraun minimu neebe mak Gabinete Avaliasaun Lisensiamentu no Akreditasaun tau ona,” dehan Ministra Eduksaun (ME), Dulce de Jesus Soares ba jornalista sira iha City 8 Manleuana, Kinta nee (23/04/2026).
Nia dehan, ba eskola neebe mak laiha lisensiamentu, ida nee mak ME la ba taka sira, maibe bolu sira atu bele kumpri regras neebe mak hatur ona iha ME, sira iha obrigasaun atu hanorin lingua ofisial, nunee mos istoria TL nian.
“Ita fo tempu ba sira, akreditasaun nee sira iha lisensiamentu, normalmente kuandu sira prienxe padraun ba lisensiamentu, ita fo lisensiamentu ba tinan rua, kuandu tinan rua sira seidauk hetan akreditasaun, sira bele mai extende sira nian lisensiamentu, maibe sira tenke iha obrigasaun ida atu ba hetan akreditasaun, nee laos ME nian papel, maibe akreditasaun sira tenke rekore ba iha ajensia internasional ba akreditasaun mak fo akreditasaun ba sira,” katak nia.
Nia akresenta, nee responsabilidade husi eskola ida-idak nian, atu nunee bele kompriende katak laos ema ida mai loke eskola ida iha Timor koalia englesh bolu nia eskola internasional, maibe atu sai eskola internasional nee ninia kriteria nee iha, tanba eskola barak loke iha Timor sira hatete aan katak sira eskola internasional.
“Maibe kuandu sira barak la hetan akreditasaun, saida mak sira halo, tinan-tinan sira tenke ba tuir ezame nasional iha Ministériu Edukasaun ba terseiru siklu, nunee mos ba ensinu sekundariu, atu nunee sertifikadu ida neebe mak labarik sira hetan nee bele ofisial, tanba sira nian eskola kuandu sira ba tuir teste iha fatin seluk, tanba sira la hetan akreditasaun, entaun sira nian eskola la hetan rekonhesimentu,” dehan nia.
Nia dehan, ida nee mak sai problema, tanba nunee mak durante nee koopera diak tebes ho sira neebe koalia sira nia ann katak, sira eskola internasional hakarak ka lakohi sira tenke ba hetan akreditasaun ida tuir padraun neebe mak hatur tiha ona atu hetan akreditasaun eskola internasional nee.
(jac)
