DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial PdC, CJMdC, FSdC, AZCdC, tanba komete krime hasoru lezadu inisial MP.
Iha indisus sufisiente katak, iha loron 05 fulan Junu 2025, tuku 20:05, lezadu MP hamutuk ho membru familia ida, ba hasoru arguidu PdC, tuir konvite husi nia atu koalia kona-ba konflitu familia.
Iha fatin neeba arguidu PdC koalia ba vitima ho liafuan, ita kaben ho hau nia oan feto, keta ikun naruk, tuir mai arguidu CJMdC hakbesik vitima neebe tuur iha kadeira tebe dala ida kona iha lezadu, halo nia senti moras boot no monu ba rai.
Bainhira lezadu monu hela iha rai, arguidu FSdC kontinua tebe lezadu.
Tuir kedas, arguidu AZCdC kontinua tebe kona iha lezadu nia ibun halo raan sai.
Ikus liu, bainhira lezadu tenta hamriik, arguidu PdC aproveita nia frajilidade no tuku iha ulun kotuk halo lezada monu to dezmaia iha rai.
Arguidu sira halo ho intensaun atu halo sofrimentu fiziku ba lezadu no estraga nia isin, no sira konsege realiza ida nee.
Arguidu sira hatene katak aksaun hirak nee proibidu tuir lei, maibe sira halo ho livre, konsiente no voluntariu.
Ho nunee, arguidu sira nudar koautor material, komete krime ofensa ba integridade fisika simples, tuir artigu 145.º, ho referensia ba artigu 30.º n.º 2, husi Kodigu Penal.
Hatan ba akuzasaun nee, arguidu PdC deklara katak, momentu neeba sira deskobre katak sira nia oan feto isin rua fulan tolu ona, no antes lezadu lori sira nia oan feto ba halo tratamentu iha hospital, tanba lezadu rekonese oan neebe iha isin lezadu nia oan.
Arguidu deklara, depois iha loron seluk lezadu chat ba iha arguidu nia oan feto katak, arguidu nia oan feto la bonita, lezadu tama komarka mos diak, husik hela arguidu nia oan feto mos diak.
Arguidu deklara, momentu neeba rona mensajem nee halo arguidu nervoju, tanba nee arguidu sira mos ba husu lezadu. Iha momentu neeba arguidu koalia hela ba lezadu, maibe lezadu la atensaun, ho ida nee maka arguidu nia oan mane CJMdC ba tebe kadeira hodi lezadu monu tun.
Arguidu deklara nia la tuku lezadu, maibe nia oan mane sira maka baku, kalan ona arguidu la dun hare mos ida.
Arguidu deklara, too agora lezadu seidauk hola feto ida.
No arguidu CJMdC deklara katak, nia maka tebe iha lezadu nia parte koskoleta nian, tanba momentu neeba arguidu PdC hanesan sira nia aman koalia ba lezadu konaba mensajem neebe lezadu manda ba iha sira nia feton, maibe lezadu tur hela arguidu koalia lezadu la rona no uja hela henset.
Arguidu FSdCLD deklara katak, momentu neeba lori duni liman tukulezadu, tanba arguidu PdC hanesan sira nia aman koalia ba lezadu, maibe lezadu la atensaun hodi rona.
Arguidu AZCdC deklara katak, momentu neeba arguidu la konsege ba tuku lezadu, tanba arguidu nia inan boot kaer metin hela arguidu.
Lezadu MP deklara katak, nia maka moris hamutuk ho arguidu sira nia feton, maibe arguidu sira halo deskriminasaun ba lezadu dehan katak, lezadu kiak, uma aat, no bee dook husi uma.
Lezadu deklara, rona lia fuan sira nee husi arguidu sira, halo lezadu sente fuan moras hodi manda menajen ba iha arguidu sira nia feton katak, o la bonita iha feto ida bonita liu o.
Lezadu deklara, momentu neeba arguidu sira hatene mensajen nee, arguidu sira bolu lezadu ba iha arguidu sira nia uma atu rezolve.
Lezadu deklara, too iha arguidu sira nia uma, arguidu nain haat halo agresaun hasoru lezadu.
Rona tiha deklarasaun husi arguidu, Tribunal husu atu tama ba iha alegasaun.
Iha alegasaun, Ministeriu Publiku Pedro Baptista deklara katak, iha duni agresaun hasoru arguidu. Tanba nee MP husu Tribunal tetu atu aplika pena multa ba arguidu sira.
Enkuantu husi parte defeza arguidu sira nian Anselmo Akara deklara katak, arguidu sira konfesa ba faktus, katak sira halo asaun nee tanba deit arguidu mensajem ba sira nia feton, hodi lori fali feto seluk hatun nian.
Tanba nee defeza husu ba Tribunal, tetu deklarasaun sira hotu hodi aplika desizaun neebe justu ba iha arguidu.
Rona tiha alegasaun nee, Tribunal adia ba loron seluk hodi rona fali desizaun husi Tribunal.
Audensia julgamentu nee, prezide husi Juiz Singular Ersilia de Jesus, Ministeriu Publiku reprezenta husi Prokurdor Pedro Baptista, arguidu sira hetan astensia legal husi Defensor Publiku Anzelmo Akara.
(ter)
