DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial FSG, tanba komete krimi hasoru lezada ho inisial MB.
Tuir akuzasaun neebe iha katak, iha loron 07 fulan Setembru tinan 2023, haleu oras tuku 15:00 OTL, iha Bekora, lezada koalia ba arguidu atu ba buka servisu, maibe arguidu hatan ho nervozu hodi koalia aat ba lezada.
Iha tempu neeba, arguidu foti surik ida atu sona lezada, maibe la konsege, tuir mai arguidu foti kaneka neebe nakonu ho bee hodi fakar ba iha lezada nia isin, no arguidu lori liman tuku lezada nia kotuk laran dala haat, no arguidu kaer iha lezada nia isin riba ba kama leten, tuir mai arguidu lori liman tuku iha lezada nia ulun.
Konsekuensia direita husi agresaun fizika nee, lezada hetan moras iha fatin atinzidu. Momentu neeba lezada la ba halo tratamentu iha hospital. Arguidu pratika ona krimi hasoru lezada rejista ho NUK 0219/22.DIBCR no NUK 0096/23.PNSIC.
Arguidu FSG komete aktu nee ho forma livre, deliberada no konsientemente, hatene katak foti kaneka neebe nakonu ho bee hodi fakar ba iha lezada nia isin no arguidu lori liman tuku lezada nia kotuk laran dala haat, no arguidu kaer iha lezada nia isin riba ba kama leten, tuir mai arguidu lori liman tuku iha lezada nia ulun, nuudar meiu neebe aptu hodi hamosu ofensa ba lezada nia isin lolon no saude. Arguidu hatene katak, nia hahalok nee proibidu no punidu tuir lei penal.
Konstitui arguidu FSG, nuudar autor material ho forma konsumadu ba pratika krimi ofensa ba integridade fizika simples ho forma violensia domestika previstu no punidu tuir artigu 145 husi Kodigu Penal no Lei Kontra Violensia Domestika numeru 07/2010, loron 07 fulan Julhu.
Hatan ba akuzasaun neebe iha, arguidu deklara katak, iha momentu neeba arguidu la halo agresaun fizika hasoru lezada, maibe momentu neeba arguidu koalia deit no hodi kaer lezada nia liman rua.
Entretantu lezada MD deklara katak, iha momentu neeba arguidu koalia lori hirus no tolok, arguidu halo agresaun fizika sira nee lezada la lembra ona.
Lezada mos deklara tan katak, lezada mos ho kondisaun moras mental, ho nunee saida Mak akontese ba nia la lembra ona.
Rona tiha ida nee, iha alegasaun Prokurador Napoleao Soares husu ba Tribunal atu tetu didiak hodi aplika desizaun ba arguidu.
Enkuantu husi parte Defeza Manuel Exposto husu Tribunal atu absolve arguidu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juis Singular Jose Quintao, Ministeriu Publiku reprezenta husi prokurador Napoliao da Silva, arguidu hetan asistensia legal husi defensoria publika Manuel Exposto.
(ter)