DILI, STLTIMORLESTE.com – Tribunal Judisial Primeira Instansia Dili halo julgamentu ba arguidu ho inisial BMM, tanba halo agresaun fizika hasoru lezada ZFSA hanesan nia feen.
Tuir akuzasaun neebe Juiza Singular Ana Paula Fonseca le sai iha loron Tersa nee katak, arguidu BMM ho lezada ZFSA hela no moris hamutuk iha uma ida nuudar feen ho laen, hahu iha tinan 2018.
Durante forma sira nia uma kain, lezada ho arguidu kous oan mane ida, ekonomikamente lezada dependensia ba iha arguidu.
Iha loron 17 fulan Marsu tinan 2024, oras tuku 15:00 OTL, arguidu halo agresaun fizika hasoru lezada iha sira nia uma Bekora, Dili.
Motivu husi problema nee, tanba iha oras tuku 10:00 OTL, arguidu sai husi uma, liu tiha oras ida nunee lezada telefone tuir ba arguidu atu tula lezada ba sosa naan manu atu halo sate, maibe arguidu nia telemovel mate hela alias la ativu, too fali oras tuku 12:00 OTL arguidu seidauk fila ba uma mak lezada lori sira nia oan ba tiha lezada nia familia iha Tasi Tolu.
Iha oras tuku 15:00, bainhira lezada fiła fali ba uma iha Bekora, arguidu toba hela iha kuartu laran no lezada komesa bolu arguidu, maibe arguidu la loke odamatan ba lezada, arguidu hasai liafuan mal ba lezada husi kuartu laran, hafoin arguidu mos loke odamatan ba lezada.
Bainhira lezada tama ba kuartu laran, arguidu husu ba lezada katak labarik iha neebe, lezada hatan katak o husu fali mai hau, arguidu dehan ba lezada se labarik laiha, entaun o mos aruma o nia roupa sai husi uma nee, hafoin lezada hatan ba arguidu los ona, hau mos sai husi o nia uma, ho ida nee mak halo arguidu hirus hodi halo kedas agresaun fizika hasoru lezada.
Momentu nee arguidu lori ai naruk ida hodi baku dala ida ba lezada nia ulun, maibe lezada lori liman hodi satan netik tiha no ai kona fali lezada nia liman, arguidu foti fali masa fatin lixu nian hodi baku dala rua ba lezada nia ulun, arguidu mos kontinua lori liman hodi tuku dala ida iha lezada nia rentos, tuir mai arguidu lori ain hodi tebe tan dala ida kona iha lezada nia knosan parte los mak lezada mos halai ba halo kedas keixa iha Postu Polisia Cristo Rei, Bekora, hafoin polisia transporta kedas lezada ba halo tratamentu saude iha Pradet.
Konsekuensia husi hahalok arguidu nian, lezada sente moras iha nia rentos, ulun parte kotuk, liman ho kotuk laran.
Arguidu halo họ forma livre, ho depropozitu halo agresaun fizika hasoru lezada, nuudar arguidu nia kaben, katak lori ai, liman ho ain hodi halo agresaun hasoru lezada, konsidera hanesan meiu ida hodi halo moras ba lezada nia isin, tuir buat neebe mak hakerek ona iha leten.
Hahalok arguidu nian ho konsiensia rasik no hatene katak hahalok nee lei bandu, maibe arguidu halo nafatin.
Ho hahalok sira nee, konsidera arguidu BMM hanesan autor material ho forma konsumadu, pratika krimi ida, Violensia Domestika tuir lei n° 7/2010, ho forma ofensas integridade fizika simples, tuir artigu 145, husi Kodigu Penal.
Iha sala julgamentu laran arguidu konfesa ba faktus, katak momentu neeba arguidu baku duni lezada, tamba nia husu labarik dehan labarik iha hela lezada nia familia sira.
Arguidu deklara katak, agora arguidu ho lezada diak malu ona, maibe lezada sei hela ho nia maun sira, tanba ho razaun momentu sira problema nee lezada mos problema ho arguidu nia aman ho nunee familia rua seidauk rezolve problema nee mak lezada sei hela ho nia maun sira.
Arguidu hatete ba Tribunal katak, arguidu arepende ho nia hahalok no iha futuru arguidu sei la halo tan.
Lezada mos hatete ba Tribunal katak, lezada lori labarik ba nia familia ho razaun arguidu la fo osan ba lezada, no la sosa hahan ba sira, arguidu nia inan aman ba mak sustenta fali sira.
Lezada deklara, arguidu servisu simu osan US$ 180, maibe osan sira nee la fo ba lezada. Kadavez lezada ho arguidu hirus malu mak arguidu fo osan, sosa hahan hanesan foos mina sira nee.
Lezada mos deklara tan katak, labarik nia eskola lezada mak tau matan no kadavez lezada kontaktu arguidu husu osan ba labarik nia presiza, maibe dala ruma arguidu la foti ou arguidu foti mos langsung hasai liafuan mal ba lezada.
Lezada deklara, agora arguidu ho lezada diak malu ona, maibe lezada hela ho nia familia sira. Lezada mos hatete ba Tribunal atu fila fali ba arguidu labele ona, tanba arguidu mos hola tiha feto seluk.
Tribunal rona tiha parte rua, Tribunal husu ba iha Prokurador no Defeza submente kedas ba alegasaun.
Iha alegasaun Prokuradora Bemvinda do Rozario husu ba Tribunal kondena arguidu ho pena prizaun tinan 2 no suspende ba tinan 2.
Enkuantu parte defeza husu ba Tribunal atu aplika pena multa ba arguidu.
Tribunal rona tiha parte rua, Tribunal Adia ba loron seluk atu rona desizaun.
Audensia julgamentu nee preside husi Juiza Singular Ana Paula Fonseca, Ministeiru Publiku reprezenta husi Prokuradora Bemvinda do Rozario, arguidu hetan asistensia legal husi Defensor publiku, Henrique Mariz.
(ter)
