DILI, STLTIMORLESTE.com – Loron veteranu neebe monu iha loron 3 fulan Marsu nee, konsidera hanesan loron importante tebes, maibe Governu la halo buat ida iha loron nee, tanba nee Sekretariu Jeral Partidu FRETILIN, Mari Alkatiri deside hodi vizita Hospital Nasional Guido Valdadares (HNGV).
Tuir Sekretariu Jeral Partidu FRETELIN, Mari Alkatiri katak, Governu la halo buat ida ba loron ida nee, nuudar fundador, nuudar lider Partidu Opozisaun boot liu deside hodi halo buat ruma atu rejista, atu loke debate ba vizaun pozitiva laos loke ba vizaun negativa, no deside atu vizita oituan fatin importante sira iha Dili nee, hanesan parte ida ba iha fulan Marsu komemora loron veteranu nian.
No vizita nee atu bolu hikas politiku sira hotu, organizasaun no sosiedade sivil, atu koalia no diskute hamutuk tau lia hamutuk atu rezolve problema importante ida nee, rezolve ho sentidu objetivu rezolve laos fo sala ba malu, atu rezolve duni kona-ba preokupasaun balu ahi neebe mate.
“Ahi mate iha nee la iha problema boot, iha uma baibain laiha problema boot, maibe iha servisu balu iha problema boot, tanba nee hau muda tiha hau nia desizaun, hau foti desizaun ohin atu vizita HNGV,” dehan Mari ba jornalista sira iha Farol, Segunda (03/03/2025).
Nia hatutan, iha vizita hodi haree konsekuensia saida mak akontese, bainhira ahi mate iha HNGV, iha vizita nee atu fanu laos atu akuza A ka B, atu fanu ita hotu katak, ita hotu mos tenke preokupa servisu sira neebe garante ema nia vida moris kura ema. Tanba nee buka hatene atu fanu, laos buka hatene hodi akuza, ba iha HNGV hodi hatene buat sira nee hotu.
Depois vizita remata Mari dehan, saida mak rona dehan aimoruk laiha, no observa haree aimoruk balu sei falta no balu iha hela, maibe em termus administrasaun tenke kuidadu didiak, tanba ba oin bele laiha ona, signifika aimoruk sira neebe mai nee tenke iha jestaun ida neebe diak.
Mari reforsa, vizita nee atu hafanu deit sira neebe halo hela jestaun, atu halo jestaun ho diak. No haree fali fatin bebe sira nian, se akontese fali ahi mate hanesan loron hirak liu ba bele iha kauza ba bebe sira.
Iha hospital atu salva ema nia vida, tanba nee tau importansia no tuir informasaun ema neebe haree kona-ba jerador la selu nian, tuir lo-loos haree katak nia knaar importante, no ida nee falha iha jestaun hahu husi ministeriu too mai iha baze.
Iha fatin hanesan, familia pasiente Teodoro De Deus Pereira dehan, hanesan familia sente triste kuandu ahi mate iha HNGV.
Durante ahi mate fo impaktu tebes ba bebe oan sira neebe baixa hela, no iha hospital dala ruma ahi mate jerador lakan kedan, maibe momentu nee ahi mate jerador labele moris rasik, ida nee tekniku sira mak bele hatene,” dehan nia.
Nia hatutan, ahi neebe mate hanesan aman ba bebe sente triste tebes, maibe maske ahi mate mediku sira kontinua halao sira nia servisu hodi atende pasiente sira.
Tanba nee husu ba iha Estadu atu tau atensaun ba kestaun nee, liu-liu haree liu kona-ba ahi, tanba bebe balu sei baixa hela, no mos inan balu iha sala operasaun se ahi mate mos ladun diak atu halo atendimentu ba pasiente sira.
Nia dehan, durante ahi mate la fo risku ba bebe sira lakon vida, no mediku sira uza lampu hodi atende pasiente sira. No husu ba iha parte sira atu haree ba oin, iha jerador ida neebe diak atu ahi mate nia bele lakan rasik, atu apoiu mediku sira halao knaar.
Tuir observasaun STL nian, Sekretariu Jeral hahu nia vizita iha HNGV iha tuku 9 dader, vizita iha sala balu neebe pasiente sira baixa, hanesan Emerjensia, Murtuariu hodi haree ruin sira neebe tau hela, no ikus liu iha fatin Permatur ba bebe kiik sira neebe baixa hela.
(ter)
