DILI, STLTIMORLESTE.com – Foin lalais Eis Prezidente Republika Francisco Guterres Lu Olo, Eis Prezidente Republika Taur Matan Ruak, Jeneral Reformado Lere Anan Timur nomos Komandante F-FDTL, Falur Rate Laek hasoru malu koalia kona-ba situasaun rai laran, la koalia politika.
Kestaun nee hatoo husi Jeneral Reformado Lere Anan Timur ba jornalista sira iha salaun UNTL, Sesta nee (24/04/2026).
Nia hatete, sira nia hamutuk laos foin maibe dezde iha ai laran too agora sempre hamutuk, no hasoru malu nee koalia konaba situasaun rai laran laos politiku.
“Ami nain haat hasoru malu, ami neebe tempu uluk bolu komando iha ai laran, komando ai laran Sabika ho Aluk mak la mai, sira nee mak la mai maibe ami iha neeba balun bele espekula katak nain haat nee hamutuk ona, ami nee hamutuk nafatin laos foin mak hamutuk, ami hamutuk nafatin, ami iha neeba koalia konaba situasaun iha rai laran, halo oinsa estabilidade nee iha halo oinsa para ita nia lideransa sira nee hamutuk, ida nee mak koalia, ami la koalia konaba politiku.
Jeneral Reformado Lere dehan, iha hasoru malu nee koalia konaba situasaun rai laran, oinsa situasaun bele lao hakmatek.
Aleinde nee koalia mos konaba lei neebe hatete se mak idade 60 anos tenke reforma, entaun sira neebe mak ativu iha F-FDTL mos idade avansadu ona sei ba hotu reforma hanesan Komandante Aluk, Maunana, Falur sei ba hotu reforma.
Lere dehan, F-FDTL harii husi FALINTIL, no FALINTIL nakfilak aan ba Forsa Defeza Timor Leste F-FDTL nee kestaun ida.
“kestaun ida ke ami diskute aban bainrua nee lao nusa, agora atu sae ba Komanda nee se mak atu ba komanda, hanesan ohin hau dehan nee kareira sein duvida, se Coliati nia mak agora segundu mais kuandu tinan too ona sai, mais hau rekomenda deit ba lei nain sira kareira iha forsa Armada ho polisia nee la hanesan ho kareira iha Governu,” katak nia.
Nia hatete, se iha Governu ohin ministru ida sai aban ministru seluk bele troka, mais militar lae, tanba militar ho polisia nee kareira ema ba Xefe Estado Maior ka nee preparadu hanorin ba Xefe Estadu maior.
Lere hatete, sira mak laiha formasaun maibe ida neebe tuir sira nee hotu hotu tuir formasaun, karik mak sei komanda karik membru F-FDTL idade 60 maibe sei bele kontinua se sai buka fali difisil.
Aleinde nee ohin koalia situasaun rai laran nee espesifiku konaba saida? Hatan ba kestaun nee Letre dehan iha parlamentu temi konaba mafia, maibe temi fali Prezidente Republika nee labele temi individu Ramos Horta bele maibe temi Prezidente Republika nee afeita ba soberanu.
“Tanba nee husu deputadu, deputada matenek boot sira neeba nee se iha evedensia lori ba tribunal,” dehan Lere Timur.
Nia hatete, tenke koalia kuidadau ho sentivu konaba destinu nasaun nia tenke ho kuidadu, tuir Lere iha Parlamentu nasional koalia etika laiha hatudu moe iha publiku, ezemplu koalia konaba faan feto entau sira feto iha neeba dignidade laiha hotu kedas, se hanesan nee dehan feto faan aan mak ba deputada nee, no mane faan feen mak ba deputadu nee ida nee moe boot.
Aleinde nee oinsa Jeneral Reformado Lere nia haree kona-ba peska illegal iha TL nee, hatan ba kestaun nee Lere hatete, se kuandu ema hetan ona pontu fraku bele ba naok ikan, hanesan mos iha uma kuandu seguransa laiha bele ba naok. Maibe liga ho peska ilegal foin lalais Polisia Maritima kaer ona balun neebe agora sira mai tan mos tauk ona.
(eme)
