BAUKAU, STLTIMORLESTE.com – Governu liu husi Ministeriu Administrasaun Estatal (MAE) sei fo dalan ba komunidade sira hodi deside Suku Waitame nia destinu ba Postu Administrativu Kelikai Antigu no Kelikai.
Ministru Administrasaun Estatal, Tomas do Rosário Cabral esplika, kriasaun Postu Administrativu foun rua hanesan Kelikai Antigu no Matebin hodi aumenta Postu neen iha Munisipiu Baukau ba Postu Ualu husi Governu anterior, nunee iha mandatu Governu atual ofisializa Postu foun rua refere tuir lei divizaun terriorial neebe iha Suku lima (5) mak hanesan Suku Abafala, Afasa, Gurusa, Namanei no Waitame, maibe relasiona ho preokupasaun komunidade nian Autoridade Munisipal Baukau liu husi Konselhu Konsultivu Munisipal, ho votus deside Suku Abafala matein hela ho Kelikai, enkuantu Suku Waitame pertense ba Postu Kelikai Antigu.
Hafoin rezultadu Konselhu Konsultivu Munisipal publika mosu reasaun husi komunidade Suku Waitame, tanba balu hakarak mantein iha Postu Kelikai no balu kumpri lei divizaun terriorial pertense ba Postu Kelikai Antigu, maibe husi rezultadu Konselhu Konsultivu Munisipal refere seidauk hetan aprovasaun.
“Konselhu Konsultivu Munisipal aprova ho votus, mais la aprova Aldeia A B atu ba neebe, hau haruka despashu fila fali sira iha kraik mak tenke deside, hau Waitame mais tama ba Kelikai grupu ida nee para ita hadia tiha, re-publika diploma ministerial,” hateten Ministru Administrasaun Estatal, Tomas do Rosário Cabral liu husi sesaun husu no hatan iha ambitu Mett the Press iha Vila Antiga Baukau, Sesta (10/04/2026).
Nia sublina, ba asuntu refere iha tempu badak Ministeriu Administrasaun Estatal sei haruka ekipa nasional hodi fo oportunidade ba komunidade Suku Waitame hodi deside, nunee prepara Munisipiu Baukau ba eleisaun Governu Lokal iha tinan 2027.
Tanba tuir Ministru Administrasaun Estatal, problema Suku Waitame mak dezisaun foti husi Nasional, konsidera Governu laiha Autoridade.
“Nee problema sosial ita la konsege rezolve, hau husu deskulpa ba povu Waitame, Governu sentral mak laiha kontrola, prosesu mak ida nee imi tenke deside se mak ba tuan se mak mantein,” Ministru Tomas akresenta.
(tom)
